Gobierno venezolano a confirma cu nan a tumba e avioneta diahuebs mainta!

CARACAS/ORANJESTAD – Gobierno venezolano diabierna atardi a admiti di a tumba un ‘narco avion’ diahuebs, pero a segura cu e no a viola e espacio aereo di Aruba. Minister di defensa venezolano Vladimir Padrino a declara na e agencia di noticia Reuters awe nochi, cu e avion a wordo ‘inutiliza 25 miya noord oost di e base Josefa Cameho. “Es decir, nos awa teritorial”, Padrino a sigui bisa. Cu esaki, e misterio di ken a tumba e avion abou, ta keda clarifica. Segun Padrino, diahuebs un biaha mas un avion a drenta espacio aereo venezolano y a aterisa na (estado) Apure” Padrino a bisa. “Saliendo, nos medionan aereo a intercepta e avion, y e no kier a scucha nos orden”. Segun e mandatario venezolano, ta e ora ey a dicidi di tumba e avion. E minister a confirma tambe cu Venezuela tin leynan cu ta permiti tumba avionnan cu ta viola su espacio aereo.

Mientrastanto awe tardi autoridad di Aruba a divulga cierto informacion riba e caso di e avion, y entre nan, cu a confirma awe cu e bultonan confisca, ta gran parti contene cocaina. Esaki segun Fiscal mayor Eric Olthof durante e conferencia di prensa. “Un total di 400 bulto cu cocaina a wordo saca for di awa na e sitio di e accidente, y treci tera. A test varios di nan y nan a test positivo pa e substancia illegal cocaina”. Ademas di esaki, Olthof a confirma tambe cu e avion tabata uno di matricula mericano, pero no a divulga e matricula mes.

KICO MAS A HAYA

E fiscal mayor a mustra cu hopi mas cu esey no por divulga, ya cu e investigacion ta canando su caminda ainda. “Bou di guia di Ministerio Publico, ta haciendo un investigacion rigoroso e intensivo pa haya sa e motibo real di e caida di e avion. E investigacion aki obviamente no a termina”, e fiscal a sigui bisa. E la confirma tambe cu e partinan di un avion tambe a wordo haya na e sitio y mas probable ta trata di e avion concerni. “Nos a tuma e partidonan aki tambe den beslag y ta haciendo e investigacion necesario riba e parti aki”. Tambe a confirma cu no tin sobreviviente, pero mes momento no por a divulga cuanto hende, ni ki parti di curpa a sera haya. “Si a haya parti cu ta parce na un curpa humano cu lo tin cu wordo investiga tambe. Cuanto persona tabata den avion, no ta conoci y ta wordo investiga”. Mientras cu e avion tabatin registro mericano, no por a saca afo ainda kico e destinacion final ni e punto di salida tabata. “Si ta confirma cu e destinacion no tabata Aruba”.   

KICO A PASA

Tabata diahuebs mainta cu minister di Husticia di Aruba Arthur Dowers a confirma cu enberdad un avioneta priva a cay den awa teritorial teritorio di Aruba, despues cu e tabata persigui pa dos otro avion di Venezuela militar/policial (tipo f-16) . E avionnan cu tabata persigui e avion priva, no tabata den teritorio di Aruba.

PERSECUCION 

Mientras cu e mandatario a confirma e persecucion, e no por a confirma pakico e avioneta a cay ni si ta e avionnan militar a derumba e avioneta. “Nos no por bai riba speculacion cu nan lo a tira riba esaki, y esey no ta confirma” Dowers a bisa. Loke por confirma solamente ta e prome informacion. “Un dado momento e avion a bay for di radar” e mandatario a sigui bisa. “E avion cu a cay, ta den awanan teritorial di Aruba, y pa e motibo ey e imagen di radar di Corsou tin e informacion ey tambe”.

OPERACION HUDICIAL

Unabez cu e avion a cay den awa, kustwacht y polis maritimo di Aruba a yega na e area ey y a constata cu tin partinan di curpa humano, parti di metal cu ta mustra di ta di un avion y cu tin algun pakete. No por confirma ki tipo di paketenan esaki ta, pero ta haciendo investigacionnan necesario pa haya sa mas informacion riba.