Webb: Instituto financiero ta nenga habri cuenta bancario pa partido politico HTC

ORANJESTAD – Pa di dos biaha e instituto financiero Aruba Bank ta nenga pa habri cuenta bancario pa e partido politico Hubentud Tresiendo Cambio (HTC). Asina e lider politico, e hoben Gilbert Webb a bisa den e programa politico riba noticiacla diaranson anochi. E prome biaha tabata na September aña pasa y atrobe na februari di e aña aki. Segun Webb, e motibo duna ta pasobra e banco no tin informacion di unda e fondonan cu e partido ta ricibi, ta bin. Pues nan ta duda di cu e placa cu ta drentando, ta placa bon y como tal pa evita problema, ta opta pa nenga e partido politico. Recientemente e instituto financiero tabata den publicidad caba pa a nenga un establecimento comercial (Bochincha Container Yard) un cuenta bancario, debi cu su propietario, ex politico Otmar Oduber ta un sospechoso den un caso penal. Oduber y BCY a gana e caso aki ora cu nan a hiba e instituto financiero corte. Den e caso di e partido politico HTC, Webb ta sigura cu e fondonan ta bin di fundraising mescos cu tur otro partido. Pa motibo di tempo, mirando cu gobierno a entrega retiro y cu awor tin eleccion, no ta logra hiba e banco en cuestion corte, manera cu a sosode cu BCY. Asina mes nan ta mustra cu nan lo bay dilanti. A bisa cu no a purba cu otro banconan pasobra e banco en cuestion ta conoci pa bon servicio y semper a usa e banco ey, y awor lamentablemente no ta haya oido pa habri un cuenta pa e partido.