Aruba ta conoce dos partido politico nobo otro siman

ORANJESTAD – Faltando poco pa e deadline cu partidonan politico por registra nan mes oficialmente na tempo pa participa den e proximo eleccion, noticiacla a compronde cu tin dos partido cu ta cla pa introduci nan mes proximamente. Ta trata di e partido MUHE y MBA, cu ta nifica respectivamente Muhernan Uni Hunto y Emancipa, y Mehoracion pa Bestia na Aruba. Ta trata di dos partido cu logicamente tin un grupo di enfoke specifico, esta hende muher y amantenan di bestia. Esey no ta kita afo cu homber tambe por vota pa e partido MUHE y esnan cu no necesariamente tin bestia of mascota na pecho. 

MUHE Y MBA

Mientras cu e portal aki a haya confirmacion di ambos partido, esnan responsabel pa e partido no kier a divulga mas informacion y a bisa solamente cu otro siman diaranson y diabierna respectivamente, e partido MUHE y MBA lo presenta nan mes publicamente. Mientras cu porta na Aruba esaki por zona como algo unico cu dos partido ta enfoca specificamente riba un cierto grupo, e ta algo normal den otro parti na mundo. Entre otro Hulanda mes ta conoci cu tin partido pa cierto grupo specifico. Tin partido pa hende pensionado, hende riba 50 aña, partido pa bienestar di bestia y mucho mas. Representantenan di e dos partidonan aki a sigura cu nan lo por cambia e panorama di votadornan y djis enfocando riba e dos gruponan aki, nan por genera suficiente voto pa logra asiento. 

DEFENDE MUHE Y BESTIA

Den caso di hende muher, nan kier bringa pa derecho di hende muher, y aki no ta trata solamente di casonan di abuso, pero tambe den sector laboral unda cu hopi biaha ta sinti cu ta viola e derecho di hende muher y unda cu e hende homber ta avansa mas lihe, creando discriminacion den e forza laboral na Aruba. Pa loke ta bestia, e partido tin intencion di resolve e problema di cacho na Aruba, primordialmente esnan di caya. Nan lo kier pone prioridad riba e aspecto aki unda cu implementando e loke falta di e proyecto di ley di cacho, por sigura cu e control di cacho y pushi riba caya, por keda resolve finalmente. Fuera di esaki, nan kier crea un ambiente amigable pa e mascotanan na Aruba entre otro asignando cierto espacionan publico unda cu e ciudadano por bay cu nan mascota y disfruta di un rato ameno. Keda pendiente pa e lansamento di ambos partido otro siman.