Parlamento di Aruba porfin a ricibi presupuesto 2021

ORANJESTAD - Diaranson mainta, Minister Xiomara Maduro, den calidad di minister di Finansas, Asuntonan Economico y Cultura, a ricibi Presupuesto 2021 di Pais Aruba for di man di Derrick Werleman, director di Departamento di Finansas y Jo-ann Kock cu ta encabesa e departamento cu ta traha, entre otro, e presupuesto di Pais Aruba, y despues a entrega esaki na presidente di Parlamento Ady Thijsen. Den e titular ta usa e palabra 'porfin' simplemente pa recorda cu conforme ley di contabilidad, esaki mester tabata entrega for di september di aña pasa. Ta conoci cu nos ta den un pandemia y cu un sin fin di cos a sosode cu a dificulta e entrega di e presupuesto mas prome. Hecho ta keda si, cu pa ley, e entrega ta laat. Asina mes, tin un ley tambe cu ta autorisa gobierno pa den caso asina, usa cierto cantidad di fondo di presupuesto pa asina sigui opera e pais aki. 

INOVATIVO

Presupuesto 2021 a wordo finalisa y durante e mainta aki, Minister Maduro a ricibi esaki den un formato nobo y innovativo poniendo enfasis riba e maneho di e-Governance di Gobierno di Aruba. Tur documento oficial di Presupuesto 2021 a ser entrega den formato digital, por medio di un USB. Riba e USB aki tin e ley y consehonan di e diferente ‘toezichthouders’ pero tambe a hinca un dashboard visual unda cu cada parlamentario por analisa e presupuesto mas detayadamente. Esaki lo yuda parlamento haci su trabou di un manera mas facil y eficiente. 

GRADICIMENTO

Minister Xiomara Maduro kier a gradici full e ekipo di Departamento di Finansas pa e bunita trabou haci cu Presupuesto 2021 di Pais Aruba y ta gradici nan pa e esfuerso y dedicacion cu nan a hinca den haci esaki posibel den un formato digital, marcando asina inicio di un era nobo y innovativo pa nos Pais.