Bukinan di Telefon 2015 lo keda reparti pa tur e casnan di Aruba

ORANJESTAD - E siman aki Bukinan di Telefon 2015 lo keda reparti pa tur e casnan di Aruba. Post Aruba NV lo haci entrega di e buki telefonnan 2015 via adres of postbus, pa tur casnan como negoshinan rond di Aruba.  SETAR ta informa cu si cualkier persona mester di un buki di telefon extra, e cliente por busca esaki na cualkier SETAR Teleshop of na SETAR Store. SETAR lo reparti e bukinan di telefon destina pa e hotelnan, WEB, Elmar, SITA, Airport y Valero y departamentonan di Gobierno por pasa busca nan bukinan di telefon na cualkier SETAR Teleshop, na e SETAR Store of na e departamento di Logistica di SETAR.

Post Aruba lo reparti e bukinan di telefon denter di 2 siman y si durante e periodo aki un cliente ta desea di haya mas buki di telefon e por haya esakinan na cualkier Teleshop. E portada di e buki di telefon 2015 ta representa Aruba su Tesoronan Scondi. Den nos bida diario nos ta asina ocupa cu hopi biaha nos no tin e tempo pa disfruta di nos propio isla. Masha poco nos ta tuma “vakantie” riba nos isla pa asina disfruta di e pas, trankilidad y e bunitesa cu nos dushi Aruba ofrece.

Redescubri nos Aruba di nobo door di keiro den nos Parke Nacional Arikok, banda di nos costanan, pasa den Franse Pas of gosa di nos bunita subida y bahada di solo. Disfruta di nos beachnan y relaha landando den nos awanan blauw di lama. Contempla y disfruta di e beyesa cu ta rondona nos. Ban conserva e sentimentonan aki door di ta agradecido dunando un homenahe na nos Aruba y paso nos ta biba riba un bunita isla.E buki di telefon ta consisti di paginanan Prologo, pagina Blanco, Informacion pa Turista, pagina Geel y pagina Comunitario. E pagina prologo ta reparti informacion den tres parti, cual ta Informacion General, Informacion Residencial y Informacion Comercial. Codigonan pa haci yamada internacional, informacion di departamentonan di Gobierno, Fundacion y Ortografia di Papiamento ta obtenibel den paginan di Comunidad di e buki di telefon 2015.