Mientras ta warda fecha di eleccion, a cuminsa campaña

ORANJESTAD – Mientras cu tur hende ta wardando e fecha oficial keda anuncia pa gobernador interino pa e eleccion parlamentario adelanta, algun partido a cuminsa ‘campaña’ caba activamente. Notable ta cu manera cu e anuncio a cay diahuebs di e retiro di e gabinete, avisonan, mensahenan traha caba a cuminsa bay aire riba rednan social. Algun a hasta cuminsa ofrece material di campana, mientras cu otronan a bisa pa saca material bieu y cuminsa prepara pa usa nan pa e campaña aki. 

FECHA PROPONI

E fechanan mas scucha, ta esun di 25 di juni y 2 di juli 2021, ambos cu ta riba un diabierna y de hecho ta cumpli cu e regla y leynan stipula pa cu un eleccion nobo. Manera ta conoci, for di momento cu e retiro di e gabinete ta publica, ta marca 3 luna (mas of menos) despues pa e fecha di eleccion. Aserca ta bin e ora e fecha pa entrega lista, fecha pa partidonan politico por registra y mas. 

FECHANAN IMPORTANTE

E fechanan importante cu ta cuminsa core awor, ta esun di registracion di partido, cu ta 6 siman prome entrega di lista. Pa loke ta entrega di lista, entre eleccion y e fecha ey, mester tin por lo menos 48 dia. Pues, si e fecha di eleccion enberdad bira 25 di juni 2021, e ora ta mustra cu pa mas of menos 7 di mei proximo of 14 di mei si e ta 2 di juli, riba un diabierna, por tene e parti di entrega di lista. Pero pa e prome opcion e ta hinca e registracion di partido politico den peliger pasobra de hecho, e ora no por registra partidonan nobo mas. Pero tur esaki ta depende di kico gobierno logra haci cu e fechanan.