Knops: Retiro di gabinete Wever Croes no ta afecta cooperacion entre Hulanda y Aruba

DEN HAAG – E hecho cu gobierno di Aruba a entrega retiro, no ta cambia e cooperacion entre Hulanda y Aruba pa loke ta e ayudo di salario pa e isla. Asina secretario di estado Hulandes Raymond Knops a bisa diaranson mainta na Hulanda. Segun e mandatario, combersacionan ta continua riba e pakete di sosten, cu e gabinete demisionario, pasobra esaki ta asuntonan coriente pues e ta possible. Ademas segun Knops, tin sosten politico amplio pa e paketenan economico y e reforma cu ta para pa esey. Palabracionan nobo como tal no ta na peliger segun e mandatario. Y cu palabracionan nobo, ta referi na e pakete di ehecucion y e combersacionan pa cu esaki.