DEN HAAG – E Tweede Kamer nobo a keda huramenta diaranson mainta. Tur miember a huramenta. Entre nan tin 58 persona cu ta nobo, di cual esun mas cerca di nos ta Jorien Wuite, cu tabata minister plenipotenciario pa St Maarten, na Hulanda. E ta riba partido D66 y tin e cartera e.o. di Relacion di Reino. Tin dos persona D66'ers Paulusma y De Groot no tabata presente. Ambos ta relaciona cu Covid19 y ta den cuarentena. Debi na e medida di corona, a haci e instalacion di e miembronan den tres grupo. Tres miembro ta drenta cu voto preferencial, cu ta Bouchallikht y Westerveld di GroenLinks y Koekkoek di Volt. Di tur candidato cu no tabata lider di partido, e miembro di CDA Omtzigt a haya e mayoria di e votonan preferencial esta 342 mil. E partido mas grandi den Tweede Kamer ta keda VVDcu 34 asiento, sigui pa D66 (24), PVV (17). CDA (15), SP (9), PvdA (9), GroenLinks (8), Forum voor Democratie (8). Partij voor de Dieren (6), ChristenUnie (5), Volt (3), JA21 (3), SGP (3), Denk (3), 50Plus (1), BoerBurgerBeweging (1), Bij1 (1).
HILVERSUM – E conocido presentadora di television Hulandes, conoci mas pa e presentacion di e noticianan di Sinterklaas, Dieuwertje Blok (66) ta retira di su funcion. Esaki pasobra e mester haci un operacion cu ta cambia su apariencia. E mester laga amputa su nanishi pa evita cu cancer detecta, ta plama mas leu den su curpa. Asina e la informa den un entrevista na e corant Volkskrant. Cu e entrevista, e ta purba prepara hende pa e ‘spanto grandi’ manera e mes ta yama e situacion.
DEN HAAG – Tin chens cu gobierno di Hulanda por stop su actividad riba e red social Facebook. Esaki pasobra e compania madre di e compania, esta META, no ta dispuesto pa adapta cierto risico pa loke ta informacion personal di persona. Asina secretario di estado Hulandes Alexandra van Huffelen cu tin e cartera di digitalisacion tambe. Un conseho di ‘Autoriteit Persoonsgegevens’ a confirma den un conseho na e ministerio di Binnenlandse Zaken en Koninkrijkrelaties (BZK) di e risiconan en cuestion y a conseha pa no continua cu nan actividad riba Facebook.
EINDHOVEN – E seleccion di futbol Hulandes PSV tin posibilidad pa titula campeon di Hulanda awe nochi. Awe nochi (ora di Hulanda) tin e partido entre PSV y Sc Heerenveen. Si nan gana, y Feyenoord no logra haya punto contra Go Ahead Eagles, e seleccion di Peter Bosz no por wordo alcansa mas. Hasta si PSV empata contra Heerenveen y Feyenoord perde di Go Ahead, e titulo ta di e ekipo di Eindhoven. Pa PSV, esaki lo ta e prome titulo nacional desde 2018.
DEN HAAG – Arubahuis a tene un Ban Topa diaranzon anochi 24 di April cu studiantenan for di e region di Leiden, Den Haag, Delft y Rotterdam. Esaki a tuma lugar na De Haagse Hogeschool y a conta cu presencia di Minister Plenipotenciario mr. Ady Thijsen, Minister di Finanza y Cultura Xiomara Maduro, Minister di Labor, Integracion y Energia Glenbert Croes y directora di Gabinete di Aruba mr. Joselin Croes. Tambe tabata presente directora di Departamento di Recurso Humano (DRH) Omaira Lares.
DEN HAAG – E partidonan politico cu ta formando gobierno nobo na Hulanda ta deliberando pa haci cambionan drastico den cuido medico, particularmente e suma cu e ciudadano tin cu paga su mes, conoci como ‘eigen risico’, pa e haya e cuido. Nan ta sinti cu e suma actual, 358 euro, ta mucho halto. Y ta pensando pa sea baha esaki na mitar of elimina esaki completamente. E ta un deseo ferviente di e partidonan PVV y BBB. Nan ta kere cu e suma halto di eigen risico ta pone cu hopi ta evita pa haya ayudo medico. E otro dos partidonan VVD y NSC ta mas cauteloso, pasobra si elimina e suma, ta kita e concientisacion cu cuido no ta gratis. E intencion ta pa elimina abuso den cuido medico y ta pone hende pensa dos biaha prome nan bay pa e cuido cu porta ta innecesario. Si elimina e suma, e ta costa e pais 3.6 biyon euro pa aña.
ORANJESTAD/WILLEMSTAD – Pa fortifica e poder di gobernacion riba e islanan di Reino Hulandes den Caribe, Universidad di Utrecht y de Haagse Hogeschool ta cbay ofrece un estudio parcial di ‘bestuurskunde’ hunto cu universidadnan di Aruba y Corsou. Asina e portal utoday di Hulanda ta raporta. E gabinete ta preocupa cu e gobierno di Corsou, segun secretario di estado Hulandes Van Huffelen. E ta plan tambe cu e minister Hulandes di Enseñansa Dijkgraaf a trata recientemente durante su bishita na Aruba y Corsou.