Wever-Croes: 'Awe ta un dia hopi dificil pami y mi coleganan'

ORANJESTAD – “Nos ta considere di tal peso y importancia pa gobierno, cu nos a yega na e conclusion cu nos mester tuma e conclusion politico mas severo den e caso aki” Prome minister Evelyn Wever Croes a bisa diamars atardi laat, refiriendo na e decision pa entrega retiro di su gabinete. E mandatario no a mira e asunto aki (malversacion den POR) ta bin y a bisa di tabata sorprendi. E mandatario no a duna un fecha nobo di eleccion, y tambe a sigura mesora cu lo sigui maneha e crisis di Covid, pasobra ta considera esaki un ‘asunto coriente’. 

KICO A SOSODE

Segun Wever, despues di a tuma nota di e anuncio di ministerio publico, a reuni den conseho di minister y a haya e mandato pa entrega retiro di e gabinete completo. “Pa nos, e hecho cu un persona ta wordo considera como un sospechoso ta algo hopi serio” e mandatario a bisa, refiriendo na sr Alan Howell di e partido POR. “Integridad no ta un palabra so pa nos. Integridad ta un forma di ta, di actua, hasta ora ningun hende ta mira” e mandatario a sigui bisa. E mandatario a bisa cu awe ta un dia hopi dificil p’e, su coleganan y en particular sr Andin Bikker.