Minister Bikker ta distancia su mes di partido POR y sostene retiro di gobierno

ORANJESTAD – Algun rato pasa, minister Andin Bikker a anuncia cu e la distancia su mes di e partido POR. “ Mi ta distancia mi mes di partido POR y a sostene desicion di ministerraad pa eleccion prematuro” e mandatario a bisa riba su pagina di Facebook. Segun e mandatario, referente e anuncio di un investigacion di parti di Ministerio Publico pa cu e fundacion di fractie POR, Bikker a cuminsa pa subraya cu e hecho cu Ministerio Publico a cuminsa un investigacion cu ta regarda e fundacion di fraccion di POR, ta demostra un bes mas cu Husticia ta traha sin destincion alguno. E investigacion tin pa cana su caminda y pues e lo no duna comentario riba e caso.

OPINION PERSONAL

Di otro banda, tumando nota di e noticia aki sr. Bikker a expresa su opinion personal: 'Como ser humano un noticia asina ta yenabo cu tristeza, y ta subraya cu e union politico electoral cu POR a resulta di ta uno hopi dificil, caminda cada bes a bin ta tuma nota di sorpresanan sumamente desagradabel. Dado momento bo ta cansa di cada bes haya sorpresa desagradabel y soporta critica cu no ta relata na bo persona. Mi no ta reconoce mi mes mas den POR'. Pues el a dicidi pa distancia su mes for di partido POR y a sostene decision di Conseho di Minister pa entrega e retiro di e Gabinete y yama eleccion prematuro.