Howell: Sorprendi cu ta sospecha fraccion di POR di malversacion

ORANJESTAD – Lider y presidente di partido politico Pueblo Orguyoso y Respeta (POR) Allan Howell tabata sorprendi pa e carta cu e la ricibi diamars merdia di ministerio publico, unda cu (manera cu e portal aki a raporta caba) a pone beslag riba fondo di e fundacion di e fraccion den Parlamento esta Fundacion Hunto Nos Por), o e asina yama ‘fractie geld’. Den un conferencia di prensa hopi cortico, Howell a bisa di no sa di ningun iregularidad y cu lo laga autoridad haci nan trabou y wak kico ta sali afo. Segun Howell, e comunicado cu ministerio publico a emiti, tabatin mas informacion cu den e carta cu nan mes a haya. 

COMUNICADO MAS EXTENSO

Entre otro, segun Howell, den e carta cu POR a haya, no ta haci mencion di MOT, pero den e comunicado si. Ta trata di transaccionan cu a tuma lugar cu lo a lanta sospecho. Segun Howell, ‘lo laga e onderzoek bay blijk loke cu e mester bay blijk e ora ey”. “Na momento cu e accountantnan y administratienan, esunan cu ta haci administratie wordo yama, of si nan wordo yama anto, anto e ora nan lo sa di duna cuenta debidamente si tin cualkier pregunta ariba cualkier transaccion cu tin di haber cu e fractie geld” Howell a sigui bisa. A splica tambe cu tur fraccion tin derecho riba e asina yama ‘fractie geld’ cu ta yuda nan haci ‘trabou necesario’ di e Parlamento. Esaki ta placa di fondo publico pues di belasting y aki ta unda e problema ta. Lo tin informacion cu a malusa y of malversa e fondonnan aki. Howell a mustra cu segun e comunicado di OM, ta trata di transaccionan, esta mas di uno. Ora cu a puntra e lider di partido ken ta e presidente y tesorero, el a contesta solamente cu e ta e presidente di e fundacion, pero no kier a divulga ken ta tesorero(nan) y accountant. Pero segun informacion di Camara di Comercio, sra Jacqueline van Putten ta inscribi como tesorera di e fundacion. Howell no kier a divulga ken tin acceso na e fondo y con esaki ta wordo usa, alegando cu ta detayes cu mester keda keto pa e investigacion laga sa kico ta kico. A bisa tambe cu abogado di e fundacion ta tratando pa wak kico exacto esaki ta y kico a wak cu a pone beslag. 

SLA PA PARTIDO

Howell a admiti tambe cu e noticia claro ta un sla pa e partido, y cu tur investigacion cu tin ta ‘haci fastioso’ y ta un peso ariba e partido riba su mes. “Pero mi ta kere cu si bo no tin nada irregular cu bo sa cu un hende of abo a haci, y e ora ey bo tin cu gewoon keda rustig y laga MOT (Meldpunt Ongebruikelijke Transacties) wak unda cu tabatin iregularidad y e parti administrativo lo sa con pa contesta e detayesnan ey” Howell a finalisa bisando.