HOH yegando punto critico debi na aumento di pashent di Covid19

ORANJESTAD – E cifranan di awe di Covid19 segun hospital, ta mustra cu e situacion den hospital Horacio Oduber ta hopi tenso mes. Segun e cifranan awe, tin 34 pashent pa Covid riba piso regular, siendo cu tin maximo di 36 cama. Esaki ta traduci cu si no tin cambio awe y bin dos pashent mas awe pa Covid, den cuido regular, hospital mester adapta su maneho regular. Esaki pasobra mester kita personal di otro departamento pa por aumenta e cantidad di cama pa 45 of den caso extremo, 66 cama.  Segun director di e hospital, Jacco Vroegop den un entrevista cu e portal aki a obtene di NOS, esey ta possible, pero e ta afecta e cuido regular seriamento. Cu 45 cama, mester baha den cuido regular, y cu 66 cama pa Covid, mester para e cuido regular completamente.  

SITUACION AWE ICU

Segun cifranan cu tin awe pa ICU, tin 12 persona den ICU pa Covid19, mientras cu e capacidad actual cu ICU por maneha (18 cama plus personal) ta yen cu ta nifica cu e resto ta pa pashent cu ta riba ICU pero no pa Covid19. Segun Vroegop, por aumenta esaki na 20, y si haci tur esfuerso, por yega 22 of 23 cu personal acerca. E ta zona complica, y contradictorio, pero tin splicacion. Den practica, tin 33 cama pa ICU, pero e problema ta personal. No tin personal suficiente pa tur e camanan ey. Pesey ta haciendo esfuerso maximo cu ta pone cu eventualmente por yega 20 pa 22, y maximo 23 cama incluyendo personal. Segun Vroegop, e hecho cu tin por lo menos 16 trahado di hospital den isolacion na cas , contagia cu e virus. E por zona ‘poco’ pa henter un hospital di riba 500 hende, pero e ta e cantidad completo riba un piso. 

LIMITE

En corto, e raportahe aki ta ilustra cu si e cifranan aki sigui aumenta, y nada no cambia, hospital a yega su limite di por atende cu hende. Y e ora mester cuminsa evalua pa manda hende afo. Algo cu ta possible, pero no deseabel segun e director. Loke ta molestia e director hopi, ta cu e cuido ‘regular’ ta sufri. Entre nan pashentnan di cancer. No por ta asina cu mester haci distinction entre pashent. Tur pashent ta importante, y no por label uno mas importante cu e otro, debi na e malesa. E articulo aki ta cu ayudo di material di un entrevista cu e agencia di noticia Hulandes N.O.S.  a haci cu e director, di cual e portal aki a ricibi permiso pa usa.