HOH a surpasa 40 pashent interna pa Covid19 y ta cerca di yega punto critico

ORANJESTAD – Segun cifranan difundi pa Dr Horacio Oduber Hospital (HOH) diaranson, Aruba a surpasa 40 caso di hospitalisacion pa Covid19 so. Cu esaki, e limite di cama (pero mas importante, e falta di personal pa atende e camanan) ta yegando su punto crucial. Te cu ayera, HOH tabatin 15 cama di ICU yen, di cual mayoria ta pa Covid19. A compronde di hospital cu tin posiblemente 2 cama mas disponible, prome cu e situacion yega na un punto alarmante. Y esaki no ta necesariamente debi na falta di cama, sino personal pa atende e camanan. 

E CIFRANAN

E cifranan ricibi awe, ta pone cu hospital tin 13 persona den ICU pa Covid19, y 28 riba piso regular. Hunto nan ta 41 cu ta un cifra hopi halto. Ademas tin 3 caso di ICU cu no ta Covid19 cu ta pone e situacion na 16 awe, cu cifranan nobo. Ta premira cu e situacion por bira mas y yega 18 awe na final di dia. Segun e conteo, tin lugar pa 20 pashent den ICU, completo cu personal. Por pone mas cama, pero e problema awor ta personal. Esey ta nifica cu unabez cu e dos espacionan aki yena, tin cu ‘schaal op’ e operacion, cu por nifica cu e lo afecta e operacionan planea di hospital, cu tur su consecuencia. A compronde di hospital cu ta hacienda lo maximo pa logra haya mas personal pa asisti y asina remedia y alivia e situacion primordialmente den ICU, unda cu tin escases awor di personal si cos sigui asina. For di otro fuente di hospital, ta premira cu e situacion lo aumenta cu mas pashent.