Encuesta: Tin 8% no sa si nan lo vota na September awor

ORANJESTAD – Faltando net 6 luna awe pa Aruba bay urna electoral atrobe pa vota pa un Parlamento nobo, 8% di esnan encuesta no sa ainda si nan ta bay vota, y 2% a bisa cu nan sigur no ta bay vota. Asina e ultimo encuesta di noticiacla ta mustra. Den e encuesta aki un total di 1892 persona a participa unda cu mayoria tabata homber y esnan entre 55 y 64 aña tabata cu mas a participa.

PATRONCHI DI VOTO

E intencion di e encuesta tabata pa wak e patronchi di voto pa Aruba, faltando net 6 luna (eleccion ta dia 24 di September 2021) y no asina hopi riba e popularidad di e partidonan politico. Esaki pasobra via encuesta electronico, e no ta duna un bista real di e popularidad, si un grupo di partido opta pa no participa den e encuesta. Y den e caso aki esey a resalta un biaha mas, unda cu cierto partidonan cu ta conoci di tin acogida, a opta pa no participa. Pa loke ta e resultado, e encuesta ta mustra cu di esnan cu a participa, 92% a vota den e ultimo eleccion na 2017,  pero ora cu a puntra si nan lo vota den e eleccion aki atrobe, e cantidad a baha pa 89% cu a bisa cu si nan lo vota atrobe. Aki 2% a bisa cu nan no ta vota y 8% a bisa cu no sa ainda. Pa loke ta districto, e grupo di persona cu mas a sigura cu nan ta bay vota ta bin di Oranjestad (23%), mientras cu e districto cu tin menos cu lo vota ta di Savaneta (10%). E grupo di personanan di edad entre 45-64 aña ta e grupo mas grandi di persona a bisa cun nan lo vota, mientras cu e grupo di hoben entre 18-24 aña no a mustra interes (apenas 5%) pa bay vota den e proximo eleccion. 

PAKICO NO VOTA

Entre e grupo cu no a bisa si na votamento, tin un grupo cu no kier vota (2%), un grupo cu no sa ainda (8%) , y un grupo cu no kier bisa (1%).  Entre esnan cu no sa ainda pakico nan kier vota, 4% ta bisa cu nan no ta gusta politica, mientras 48% no por haya un partido cu nan por identifica cu ne, y 2% no a vota y no lo vota nunca. Un grupo relativamente grandi (46%) a bisa cu nan tin otro motibo cu nan no ta specifica. Y esey ta un grupo cu tin cu tene cuenta cu ne. 

VOTA PA PARTIDO 

Entre esnan cu si ta vota, tin un grupo cu no kier a bisa pa ken nan ta bay vota. Di e grupo aki 69% ta considera esaki algo priva, y 4% tin miedo pa bisa pa represaya politico contra nan, y 27% ta duna un otro motibo. E resto si a bisa pa ken nan lo vota. 

PARTIDONAN 

A puntra e usuarionan cu a participa den e encuesta, pa bisa tambe pa cua partido nan lo a vota si e eleccion tabata awe, envez di aki 6 luna. Y aki partido MEP a sali como e partido mas grandi cu 31% mientras cu e partido cu a haya menos sosten ta PPA y MAS cu 0.1%. E siguiente partido despues di MEP ta AVP cu 14%, sigui pa partidonan RAIZ y CURPA cu 10%, sigui pa partido POR cu 11%. Actual partido den coalicion a haya 0.2% di e votonan. Tambe den edad, MEP y AVP a score miho den e grupo di edad mas grandi (37% y 16% respectivamente) mientras cu partido POR a score miho den e grupo di edad mas hoben (25 pa 44 aña cu 24%) aña, y RED tambe a score mas halto den edad hoben (4%). 

MEP 31%

AVP 13%

RAIZ 12%

CURPA 12%

POR 11%

Otro partido 9%

UPP 4%

ACCION21 3%

HTC 2%

RED 2%

PPA 0.3%

MAS 0.1%

NOTA DI ENCUESTA

Atrobe, ta enfatisa cu e meta di e encuesta aki tabata mas bien pa midi e patronchi di voto, primordialmente entre esnan cu no ta bay vota y esnan cu tin duda ainda, pasobra esaki ta e grupo cu lo ta importante pa ainda convence pa por vota. Mes momento nos ta conciente cu e encuesta aki mientras cu e cantidad di participante, reparti riba e districto y edad, ta duna un indicacion valido di kico ta biba eyfo, e no ta un encuesta cientifico y no tabatin aceso pa tur hende, p.e. esnan cu no tin internet, of esnan cu a opta pa no participa. Si tin un grupo di persona cu deliberadamente no a participa, p.e. pa e parti di partido, e por duna un bista eroneo riba e parti ey. Pero esey no ta kita afo, cu e ta un bista interesante.  Den e futuro cercano lo bolbe haci un encuesta asina cu e meta pa wak si a bin cambio, primordialmente den e grupo cu no sa ainda pakico nan vota of si por a convence nan cu awor si mester bay vota.