Wever; Gobierno preparando pa traha conseho di RvS riba Coho

ORANJESTAD - Gobierno di Aruba a ricibi e conseho di Raad van State riba e leynan di Reino di COHO y RAFT diabierna ultimo for di secretario di Estado Knops.Secretario di estado Knops a ricibi e consehonan un siman prome, pero a haya ta prudente pa no manda nan pa Gobierno di Aruba te ora cu papia cu e gobiernonan riba posible procedura pa encamina. E reunion aki a tuma lugar dia 18 di maart, dia di Himno y Bandera, hunto cu premiernan di Curacao y Sint Maarten. Y den e reunion ey a hasi palabracionnan tocante e procedura cu lo encamina awor. Consequentemente a manda e consehonan pa gobierno di Aruba. SIGIENTE PASONAN

Sigientemente lo cuminda deliberacionnan intenso riba e contenido di e Conseho di Raad van State. E deliberacionnan aki lo tuma lugar tras di porta sera, pasobra e reglanan pa cu consehonan di Raad van State ta stipula cu no por publica un conseho di Raad van State te ora cu e ley mes wordo entrega na parlamento.Mirando e interes grandi cu ta envolvi, a palabra cu lo pone prioridad na esaki. Despues cu Conseho di Minister di Reino trata esaki, lo comparti e texto di e ley y e conseho cu di e paisnan. RAAD VAN ADVIES

Gobierno di Aruba a ricibi tambe e consehonan di nos Raad van Advies riba e COHO y RAFT, y esakinan lo wordo usa tambe den e negosacionnan proximamente. TEAM NEGOCIADO

Gobierno di Aruba ta preparando e team tecnico cu lo negocia hunto cu Curacao, Sint Maarten y Hulanda.