Segun portal Hulandes, Raad van State ta haya COHO ta contra Statuut

DEN HAAG – E Rijkswet Caribisch Orgaan voor Hervorming en Ontwikkeling (COHO) ta contra Statuut di Reino Hulandes. Asina e portal dossierkoninkrijksrelatie ta cita fuentenan di Den Haag riba e conseho di Raad van State (RvS) cu a keda cla recientemente y cu ta mustra cu a 'lek'. E conseho oficialmente no ta publico ainda si. RvS den e conseho lo ta pidiendo secretario di estado Raymond Knops pa no ofrece e concepto actual na parlamentonan di e islanan en cuestion, pasobra e no ta bon. E noticia aki a plama diamars laat na Aruba y hasta un minister local a comparti e textonan di e portal hulandes. 

DOLOROSO

RvS ta sigui bisa e.o. cu COHO ta pone e islanan en cuestion den desventaha. Un critica continuo di e islanan ta cu Hulanda su actuacion ta atacha autonomia di e islanan. Y ta mustra cu den e caso aki, RvS ta duna nan razon. 

SOSTEN

RvS ta sostene e meta di e Rijkswet pa drecha e economianan di e respectivo islanan y pa fortifica e gobiernonan. Cu Hulanda ta condiciona su ayudo, tambe RvS ta compronde y ta completamente di acuerdo. Pero RvS no ta conosidera e forma di atende e situacion, como uno corecto, y ta duda cu e formato pensa pa e secretario, lo por conduci na resultadonan exitoso. Y manera e conseho (citando e portal Hulandes pasobra e portal aki no a haya e documento mes pa lesa:red) ta bisa, cu hincando e autoridad den un ‘armada chikito Hulandes’, envez di fortifica e autonomia di e islanan, lo mas bien debilita esaki, RvS ta teme. 

REPARTICION DUDOSO

RvS ta haya e reparticiohn di e responsabilidadnan y responsabilidadnan entre COHO y e gobiernonan y entre COHO y Caft, no mucho cla. Ta papia cu COHO ta haya autoridad mucho mas amplio, cu ta den man di gobierno di e respectivo islanan. Ademas ta cuestiona e independencia di COHO como un organo independiente, mientras cu esaki den gran parti ta funciona bou di e control di minister di BZK. Pa lesa e articulo completo, click AKI. Potret cortesia Raad van State.