DVG: E vacuna no ta evita pa un 100% cu bo lo haya Covid19

ORANJESTAD - Manera cu DVG ya a informa e vacuna no ta evita pa un 100% cu bo lo no haña COVID-19. Esaki ta splica e motibo cu hasta prome minister Evelyn Wever Croes aunke el a ricibi su dos vacunanan contra Covid19, ainda mester a bay den cuarentena dialuna. Esey tabata e pregunta grandi di hopi hende, cu no tabata compronde pakico e mester a haci esey, siendo cu el a haya tur dos vacuna caba. Pues, awe DVG den un comunicado a bolbe confirma esaki. 

E POSIBILIDAD

Segun DVG, e posibilidad ta keda cu bo por contrae esaki pero cu sintoma leve y mientras cu nos comunidad ta vacunando y ainda nos no yega un cobertura halto di entre 75%  pa 85% di vacunacion tur medida di proteccion y tur protocol ta keda vigente pa proteha esnan cu porta ainda no a wordo vacuna. P'esey e yamada ta na comunidad pa nos sigui registra y vacuna. Mas lihe nos vacuna nos comunidad mas lihe nos ta limita of stop e virus di sigui plama di un pa otro.