Venezuela por ‘derumba’ avionnan sospechoso di traficacion di droga

CARACAS/ORANJESTAD – Avionnan cu drenta espacio aereo Venezolano y ta sospecha di ta trafica droga, por wordo derumba pa avionnan militar venezolano. Esaki ta danki na un ley cu a pasa for di 2011 y cu e presidente Venezolano Nicolas Maduro na 2013 a recorda tur hende di dje. Y mirando e suseso di ayera, ora cu avionnan militar tipo f-16 a persigui un avioneta priva, tin indicacion cu esaki lo por a sosode, siguiendo margen di ley. Fuera di esey, no tin nada nobo riba e asunto aki, sino cu solamente despues di merdia, Ministerio Publico lo ofrece un conferencia di prensa riba e topico, y posiblemente contesta un cantidad di pregunta cu tin ainda.

CONFIRMA TE AWOR

E unico cos confirma ainda, ta cu e avion a cay, a haya pida di ser humano, bulto di posibel droga y e ultimo dosnan aki a wordo treci tera pa investigacion. Preguntanan manera e ‘confirmacion’ cu si ta berdad cu e avion a wordo derumba, cuanto hende tabatin den e avion, kico tabata e origen di buelo, kico tabata e mision di e buelo y unda e ‘derumbe’ aki a tuma lugar.

MINISTERIO PUBLICO

Ayera nochi Ministerio Publico a mustra NoticiaCla.com cu nada nobo no por a wordo bisa, pero esey no kier men cu no ta trahando riba e caso. For di Guarda Costa ayera tardi ainda, NoticiaCla.com a haya confirmacion cu trabounan riba laman tabata tumando lugar y cu esey no a caba pa awo.

KICO A PASA

Tabata diahuebs mainta cu minister di Husticia di Aruba Arthur Dowers a confirma cu enberdad un avioneta priva a cay den awa teritorial teritorio di Aruba, despues cu e tabata persigui pa dos otro avion di Venezuela militar/policial (tipo f-16) . E avionnan cu tabata persigui e avion priva, no tabata den teritorio di Aruba.

PERSECUCION 

Mientras cu e mandatario a confirma e persecucion, e no por a confirma pakico e avioneta a cay ni si ta e avionnan militar a derumba e avioneta. “Nos no por bai riba speculacion cu nan lo a tira riba esaki, y esey no ta confirma” Dowers a bisa. Loke por confirma solamente ta e prome informacion. “Un dado momento e avion a bay for di radar” e mandatario a sigui bisa. “E avion cu a cay, ta den awanan teritorial di Aruba, y pa e motibo ey e imagen di radar di Corsou tin e informacion ey tambe”.

OPERACION HUDICIAL

Unabez cu e avion a cay den awa, kustwacht y polis maritimo di Aruba a yega na e area ey y a constata cu tin partinan di curpa humano, parti di metal cu ta mustra di ta di un avion y cu tin algun pakete. No por confirma ki tipo di paketenan esaki ta, pero ta haciendo investigacionnan necesario pa haya sa mas informacion riba.