Oduber: Aruba ta ricibi su prome bapor crucero activo na juni awor

ORANJESTAD – E prome siman di juni 2021, Aruba lo ricibi su prome bapor crucero activo, despues cu un aña pasa e pandemia di Coronavirus a inicia. Activo, ta nifica cu e bapor ta bin cu pasahero riba dje. Durante e pandemia, Aruba a keda ricibi e bapornan crucero pero solamente cu tripulante y no turista. Awor e turistanan tambe lo cuminsa bin. Asina e minister di turismo Dangui Oduber a informa dialuna durante conferencia di prensa. Ta trata di e bapor crucero Celebrity Millenium di e liña crucero Royal Caribbean Group cu lo ta basa for di St Maarten. E bapor lo sali di St Maarten, sigui pa Aruba, Corsou y Barbados, y bek pa su base na St Maarten. Ta prome biaha cu e ta pone St Maarten como su base. Segun Oduber, ta trata di un bapor cu lo por transporta 50% di su capacidad cu ta traduci entre 1.500 pa 2000 pasahero. Tur mester ta vacuna prome cu nan subi abordo y mester tuma un PCR test prome cu aborda.