Secretario di Estado Knops a felicita Pisas cu e victoria di MFK

DEN HAAG – Secretario di estado Hulandes pa asuntonan di Reino Raymond Knops a felicita e lider di partido MFK Gilmar Pisa diasabra cu e resultado di e eleccion di diabierna. “Mi a tuma nota di e resultado. Mi ta felicita e ganadornan, particularmente MFK cu nan victoria” e mandatario a cuminsa na bisa. “Mientrastanto mi a tuma contacto cu sr Pisas y Gobernador. Den e combersacionan ey mi a indica cu mi ta conta cu un continuacion di e bon relaciona cu cual mi tabatin tambe ultimo añanan cu e gobierno. Ademas mi a tuma contacto cu premier Rhuggenaath y a gradicie pa e cooperacion excelente y su liderazgo” e mandatario a finalisa bisando. 

RENEGOSACION

Manera ta conoci, un di e puntonan di agenda di MFK su lider y futuro prome minister di Corsou, ta pa renegocia e acuerdo cu Hulanda, conoci como COHO. E mandatario Hulandes no a referi na e puntonan aki den e relato di e combersacion aki. E portal aki a compronde si di su fuentenan fidedigno, cu renegosacion no ta un opcion. Pero tempo lo bisa kico ta pasa finalmente cu e punto aki.