Career IQ ta lansa curso di Papiamento specialmente pa nos profesionalnan

ORANJESTAD - Dia 18 di maart Career IQ a lansa e pre-registracion pa nan prome curso virtual cu ta riba e topico di Papiamento Basico 1. E curso aki ta dirigi na cualkier profesional, cu kier mehora su conocemento general, gramatica y ortografia di Papiamento, como tambe lo ricibi varios tip importante na momento cu mester haci traduccion di otro idioma den e idioma di Papiamento.

E curso lo ta facilita y prepara pa 3 docente: Sra. Candy Dirkz, Sra. Sue-Ann Ras y Sra. Ingrid Van Der Linden, tur tres ta baluarte di enseñansa y mas cu 10 aña di experiencia den enseñansa y Papiamento.

E curso lo cuminsa den luna di juni riba dia 2 di juni y lo tin un duraction di seis siman. Esaki ta riba tur diaranson anochi for di 6:30 PM pa 8:30 PM di anochi. E curso lo ta presents den e forma virtual, unda cu e docentenan lo ta en bibo pa pasa door di e materia y contesta cualkier pregunta di e participantenan. Tur material, incluyendo e videonan di e les, lo ta disponibel pa dos (2) luna online, brindando asina e oportunidad pa repasa e informacion si ta desea. Na final di e curso lo tin un examen, unda cu tur participante por bin na remarca pa ricibi un certificado.

Pa registra pa e curso por tuma contacto cu Career IQ na info@careeriqaruba.com of riba nos medionan social, unda nos tin lista pa registracion. E curso aki ta recomenda pa tur profesional den veld laboral, pero no limita p’e personana cu ta forma parti, entre otro di; gerencia di empresa, mercadeo y benta, relacion publico, secretariado , social media, periodismo , administracion , politica, recurso humano, negociante, y asina por sigui menciona.

Career IQ ta un Plataforma dedica na yuda e profesionalnan hoben na Aruba cu nan desaroyo profesional y personal, mediante diferente curso y tambe programa na radio y podcast. Career IQ Aruba tin un programa na radio tur diasabra na Cool fm y un podcast presenta pa Kareline van der Linden y Darice Solognier, unda cu ta brinda varios conseho practico y eficiente enfocando riba e lidernan local den nos comunidad tocante, con cada un di nos por desaroya nos propio carera, alcansa nos metanan y logra disfruta di e bida cu nos tur ta desea.