Awe Hulanda ta eligi su miembronan pa Tweede Kamer

DEN HAAG – E cantidad di persona cu a vota na Hulanda diaranson den eleccion pa Tweede Kamer pa cuarto pa dos ora di Hulanda, cuarto pa nuebe ora di Aruba, tabata 42%. Esaki segun encuesta di e portal Hulandes di noticia NOS. Esaki ta mas cu e ultimo eleccion ora cu esey tabata 32% na e mesun ora. Minister Hugo de Jong mester a bay cas bek pasobra el a trece un pasaporte caduca. Mes momento el a informa cu e ta bay den cuarentena debi cu el a topa cu un persona cu tabata positivo cu e virus. Pero como cu e la vota via su auto, (esey ta possible tambe), no tabatin risico inmediato. For di dialuna cierto gruponan por a cuminsa vota caba y tambe via post, debi na e situacion di Corona. Mester pensa riba hendenan di edad y cu dificultad pa yega cierto caminda. Tambe esnan di riba 70 aña por a manda nan voto via post. 

URNA ELECTORAL

No tur cos a bay bon na e urnanan electoral. Na Haarlem p.e. a trece un yabi robez cu a pone cu no por a habri e stemlokaal na tempo. Na Arnhem mester a warda riba e potloodnan cora, y na Barendrecht e registro di votamento no tabata presente. Den 25 municipio a trece un cantidad di envelop sin adres, cu un stembiljet aden. Hopi urna tabata yen na Hulanda. Tabatin hopi fila na e.o. Almere, Binnenhof y na Amsterdam. E rijnan ta mas largo debi na e medida contra Corona. Un lugar cu a vota hopi tabata na stacion di trein. 

LIDERNAN POLITICO

Pa merdia, mayoria lidernan politico a deposita nan voto caba. Entre nan tin varios nobato cu ta spera riba un asiento den Tweede Kamer. Na cierto lugarnan e conteo di e votonan via post a cuminsa caba, manera na e World Forum na Den Haag y na RAI na Amsterdam.