Bultonan y resto curpa(nan) procedente di avion accidenta, treci tera

ORANJESTAD – Bultonan supuestamente di droga, y resto di curpa humano a wordo treci tera awe tardi, pa wordo investiga y trece mas claridad den e caso di e caida di e avioneta misterioso diahuebs mainta trempan. Prome nan a wordo hiba marinierskazerne na Savaneta, y despues transporta pa Macuarima. For di vocero di Ministerio Publico, Ann Angela, a compronde cu investigacion ta andando y cu OM ta lidera e investigacion cu polis ta haciendo. Den curso di diabierna ta spera cu por duna mas informacion, basa riba loke a ser haya. E no kier a confirma e loke cu a ser ‘haya’, indicando cu ta informacion hopi delicado y cu por stroba e investigacion.

KICO A PASA

Tabata diahuebs mainta cu minister di Husticia di Aruba Arthur Dowers a confirma cu enberdad un avioneta priva a cay den awa teritorial teritorio di Aruba, despues cu e tabata persigui pa dos otro avion di Venezuela militar/policial (tipo f-16) . E avionnan cu tabata persigui e avion priva, no tabata den teritorio di Aruba.

PERSECUCION 

Mientras cu e mandatario a confirma e persecucion, e no por a confirma pakico e avioneta a cay ni si ta e avionnan militar a derumba e avioneta. “Nos no por bai riba speculacion cu nan lo a tira riba esaki, y esey no ta confirma” Dowers a bisa. Loke por confirma solamente ta e prome informacion. “Un dado momento e avion a bay for di radar” e mandatario a sigui bisa. “E avion cu a cay, ta den awanan teritorial di Aruba, y pa e motibo ey e imagen di radar di Corsou tin e informacion ey tambe”.

OPERACION HUDICIAL

Unabez cu e avion a cay den awa, kustwacht y polis maritimo di Aruba a yega na e area ey y a constata cu tin partinan di curpa humano, parti di metal cu ta mustra di ta di un avion y cu tin algun pakete. No por confirma ki tipo di paketenan esaki ta, pero ta haciendo investigacionnan necesario pa haya sa mas informacion riba.