Hulanda a pone Bonaire riba codigo oraño bek debi na aumento di Covid19

DEN HAAG/KRALENDIJK – Hulanda a pone Bonaire riba codigo oraño mesora diamars ora cu a bira conoci cu e isla ta bay riba lockdown. Manera por mira riba e portal Hulandes cu ta attende cu esaki, e cambio a sosode ayera mes, esta cu ta ‘ahusta’ per 16 di maart 2021 te proximo aviso. Esey ta nifica cu por biaha solamente si ta hopi necesario. Algo cu ta perhudica Bonaire grandemente mirando cu e cantidad mas grandi di turista ta bin netamente for di Hulanda. Gezaghebber Edison Rijna no tabata sorprendi ora cu e portal aki a comunica cu ne awe mainta y a bisa cu a spera esaki. Pero cu lo traha duro pa cambia esaki bek mas liher cu ta possible. Pa loke ta e otro islanan Aruba y Corsou, nan ta riba oraño caba y ultimo dia cu a actualisa esaki tabata riba dia 3 di maart caba y ta vigente te proximo aviso.