Rijna: Bonaire ta bay den lockdown debi na situacion di Covid19

KRALENDIJK – Bonaire diamars atardi a anuncia un lockdown completo entrante 18 di maart proximo. Gezaghebber di e isla Edison Rijna a anuncia cu ta pasa pa nivel mas halto cu ta nivel 6. Y hunto cu esaki, ta implementa un Toque de Queda y ley seco tambe. Esey ta nifica cu for di 9’or di anochi pa 4’or y mei di marduga no por tin hende riba caya. Ademas ta stop benta di alcohol, alomenos cu nan ta huesped di hotel. 

PAKICO E MEDIDA

Segun sr Rijna, e situacion a bira necesario despues cu e siman aki incluyendo diamars, e cifranan di Covid19 a bira dje halto cu a mira necesidad pa implementa medida mas drastico. Pa diamars, e cantidad total di caso a bira 298 y a registra 61 caso positivo nobo pa un solo dia pues un record. E mandatario ta mustra cu e variante Britanico por ta e causa cu e virus ta plamando hopi lihe rond di e isla. E mandatario a recorda cu siman pasa ainda el a bisa cu si ta necesario, e lo no basila pa tuma medidanan mucho mas drastico. Y esaki a sosode awe. Tur negoshi no esencial ta keda cera. Scolnan ta keda cera y ta habri bek te despues di paasvacantie. Creche tambe ta keda cera. Y a pidi pa mantene tur misa di tur religion cera. Tambe a prohibi bishita na cas durante e lockdown aki cu ta valido pa 2 siman.