Lampe: Sindicatonan kier trece confusion y dividi ministernan

ORANJESTAD - Sindicato (Simar y SEPPA:red) ta trece varios punto dilanti abase emocional  y ta crea confusion den e proceso, cual ta hacie preocupante. Y alaves ta crea preocupacion cerca e team di Scol Paso Pa Futuro (SPPF). Asina minister di enseñansa Rudy Lampe a bisa den un comunicado emiti diamars atardi reacionando riba e situacion actual cu tin pa algun tempo caba. E comunicado a bin di e fuente cu semper ta manda comunicado pa e mandatario. Sinembargo den e reunion di Parlamento, a compronde for di Parlamentario pa e partido di e minister RED, cu e comunicado ta uno di management team di Emma School. 

PARLAMENTO 

Mientrastanto den un presentacion pa Parlamento riba e mesun tempo diamars, e mandatario a tilde e dos sindicatonan menciona di ta creando un situacion for di comienso, cu e unico meta pa trece division entre su persona y minister presidente Evelyn Wever Croes, y eventualmente benta gobierno abou. 

DESVIA E REALIDAD

E mandatario den e comunicado mientrastanto ta sigui bisa cu tanto personal di Emma school y Sindicato a presenta argumentonanan cu ta desvia di realidad y atacenan practicamente personal encontra di team di Maneho. Manera ta duna indicacion cu lo kita utilidad, manera biblioteca.“ Tin informacion cu a sali via medio di communicacion cu no ta cuadra y ta crea un scenario caotico cu no ta na bienestar di e interes general di e grupo meta aki” e mandatario ta sigui bisa. “ Ta importante pa trata na duna espacio, respet, dialogo y debido tempo pa atende cu retonan y preocupacionnan di personal y operacional” e mandatario a continua bisando.  

KICO A PASA CU FUSERING

Segun e mandatario, e realidad ta cu na december ultimo, ambos maneho di e scolnan Moeilijk Lerende Kinderen (MLK) a sinta hunto cu Minister Lampe y a yega na acuerdo pa cu fusering di e scolnan. Proposicion a bin di e cabesante di Emma, mirando cu den pasado a hiba combersacion y brainstorming tocante fusie. Ambos scol lo mester a ser informa di e proposicion aki. Na scol Paso Pa Futuro esaki a ser comunica, pero na Emma school esaki no tawata e caso. Siguientemente Minister ta sigui bisa cu el a laga pa e team di maneho actual di ambos scol informa nan team tocante fusering. Na januari2021 Minister a bishita ambos scol y haci esaki su mes. Despues team di maneho di ambos lo a reuni y traha riba un manera structura pa cu e fusering, a cuminsa trata riba e parti logistico, e cantidad di alumnonan y despues lo a sigui pa e parti di personal.

RECTIFICACION Y AHUSTACION

E mandatario ta papia tambe di rectificacion unda cu ta papia di  ‘swap’, es decir e utilidadnan aki lo wordo ubica na un otro caminda cu e mesun funcion.  Alaves segun e mandatario ta habri reunion cu un tono sin respet encontra di e mandatario, cu ta haci dificil pa por dialoga. Durante reunion na Emma, fecha 25 februari 2021, e personal di Emma a vocifera cu nan no ta contra di Fusering, sino lo sugeri pa hacie den fase. Minister a tuma esaki den consideracion y a ahusta e plan di fusering pa un plan di verhuizing. Loke ta di suma importancia segun e mandatario, ta pa realisa cu den e plan di fusering ta papia di un cantidad relativamente aceptabel pa cu e ubicacion na e edificio na Ayo, banda di esaki e parti curiculo ta igual, es decir mesun metodo ta wordo brinda na e grupo meta aki. 

SINDICATO CUESTIONABEL

E mandatario ta bisa cu ta cuestionabel con sindicato ta trece informacion dilanti abase emocional y no ta opta pa busca informacion corecto obhetivo, pero ta inverti mas tempo creando confusion y ophitsing cual no ta necesario. E manera con por a trata esaki por a bay den un ambiente mas trankilo y profesional. Cambio sigur ta trece retonan cune cu ambos team di maneho a cuminsa traha riba esakinan. Pa cu preocupacionnan por a handel esakinan interno. Como profesionalnan den e ramo aki nos por yega na otro y sigur  manera e dicho ta bisa, 2 cabes ta pensa miho. Lesa e documento completo AKI.