Segun encuesta, actual coalicion na Corsou ta keda reduci na mitar

WILLEMSTAD – Faltando 5 dia prome cu e proximo eleccion Parlamentario di Corsou, un encuesta pidi pa e matutinonan Extra y Antiliaans Dagblad, ta duna e coalicion actual di PAR y MAN un sota formal. De hecho, si mester kere e encuesta, PAR y MAN lo keda reduci te na mitar. E sorpresa grandi pa hopi ta cu segun e encuesta e partido MFK lo lidera e eleccion, sigui pa e partido berde Nacional. Segun esnan cu a conduci e encuesta, un grupo relativamente grandi (38%) no kier a contesta pa ken nan ta vota, pa motibo cu nan tin miedo di represaya. Y esey por tin un efecto riba e resultado. E encuesta a wordo conduci pa Kennis Centrum/UDC cu ta un grupo di Universidad di Corsou unda cu 1607 persona a participa via telefon durante 10 dia largo (1-10 maart). Di e partidonan nobo, esnan cu tin chens ta UKPK (Un kambio pa Korsou) y KEM (Korsou esun Miho) ta logra drenta.