MEP a entrega mocion di desconfiansa contra gabinete Mike Eman II

ORANJESTAD -- Fraccion di MEP den Parlamento a entrega un mocion di desconfiansa contra Gabinete Mike Eman pa e falta di maneho di criminalidad. Durante e debate cu MEP a yama, a spera di scucha di Minister Dowers kiko e ta bai hasi pa hasi Aruba mas sigur. Sinembargo, segun e partido heel, e minister no a enfoca riba esey. “Mas bien a keda tira culpa riba gobierno di MEP di 5 anja pasa y cu oposicion ta exagera. Ta e mesun pensamento eroneo di minister Dowers cu el'a expresa na anja 2012, cu criminalidad no a aumenta, sino ta e percepcion di pueblo ta malo”.

"Nos di MEP ta hibando reunionnan cu varios instancianan den comunidad y como tal ta haya hopi informacion di e problemanan real den nos comunidad, pero mas principal ta scucha con por soluciona e problemanan aki. A base di e resultadonan di e reunionnan aki nos ta trese proposicionnan den Parlamento pero no tin oido. Pero mirando e falta di accion y di interes di parti di e gobierno, e partido a presenta un mocion di desconfiansa contra Gabinete Mike Eman." lider di MEP a duna di conoce.

VOTACION

Pa loke ta e votacion 11 parlamentario di AVP a vota contra, mientras tur 8 parlamentario di oposicion a vota na fabor di e mocion di desconfiansa. Di parti di AVP Donny Rasmijn a bandona sala prome cu votacion, y Melvin Tromp a biaha pa bai festival di tumba. Segun e partido heel, e minister a haya sosten di e minimo di e mayoria y asina a scapa di e mocion aki.