Hof ta rechasa peticion di banco pa cera cuenta bek di Bochincha Container Yard

ORANJESTAD – Bochincha Container Yard (BCY) y su propietario Otmar Oduber por mantene nan cuenta bancario na Aruba Bank habri. Asina Hof a dicta diabierna den un sentencia di 4 pagina, rechasando e peticion di e instituto financiero pa ‘suspende’ e sentencia contra nan pa cu habrimento di cuenta di BCY y su propietario principal Oduber. Cu suspension di e sentencia, e banco lo por a ‘cera e cuenta’ di BYC, te ora cu Hof trata e apelacion cu e banco a entama, ya cu nan no a keda contento cu e sentencia den e caso di prome instancia. Por lo menos, esey tabata e pensamento di e banco, tras di e peticion di suspension.  

SENTENCIA

Den e sentencia recien, corte a obliga e instituto financiero pa habri un cuenta pa BCY despues cu e banco a nenga e propietario Oduber pa haci tal, citando e.o. su status di sospechoso den un caso penal andando. E hecho aki lo a pone e banco den un luz negativo segun e instituto financiero. Huez den e caso ey a rechasa e ponencia di e banco, y a mustra cu tur hende ta inocente te ora cu un huez sentencia e persona en cuestion y cu esey no por ta un motibo pa impede BCY pa tin un cuenta bancario. Ademas, e cliente a cumpli cu tur rekisito y no tin ningun motibo valido pa nenga e cliente. Y si dado caso mes cu e doño keda sentencia pa cual ta sospech’e di dje, e banco tin 2 luna pa e ora ey numa cera e cuenta bancario en cuestion. Huez den e caso ey a sentencia e banco pa habri e cuenta mesora pa BCY y pa cada dia cu no cumpli, multa e banco e suma di 2.500 florin te na un maximo di mei miyon (AWG 500.000=). 

SUSPENCION

E banco a cumpli cu e sentencia, habriendo un cuenta di banco e siguiente dia cu e veredicto a keda presenta. Remarcable ta sinembargo cu e mesun dia cu e banco a habri e cuenta pa BCY, e la usa un strategia legal door fuera di apela e sentencia, manda un peticion na Hof pa suspension di e sentencia, cu lo mester resulta den ceramento bek di e cuenta bancario di BCY, cu e intencion di tene e cuenta cera te ora cu Hof trata e caso den apelacion. Cu esaki, ta mustra cu e banco tabata haci todo por todo pa no tin un relacion bancario cu e compania, segun analistanan legal cu a comenta esaki cu e portal aki. 

MOTIVACION

Den e sentencia aki Hof a mustra cu e interes di Oduber y BCY ta conta mas pisa cu esun di e banco, pasobra si cumpli cu e peticion di suspension, esey lo nifica cu tur e tempo aki e cliente lo no por tin un cuenta bancario, cu ta dificulta su forma di opera.  Y ademas ta conoci cu niun otro banco no kier a habri un cuenta pe pues e chensnan pa un otro cuenta ta limita of hasta nulo. Esey ta pone den un situacion cu ta dune e urgencia. Ademas segun Hof, e banco no por a demonstra pakico Oduber y BCY como cliente, ta un risico inaceptabel pa e banco. Ademas, no tin ningun indicacion cu e ehecucion di e sentencia en cuestion, ta trece e relacion cu e ‘correspondent bank’ den peliger. Y cu tin otro clientenan potencial cu tambe kier habri un cuenta awor, a consecuencia di e sentencia aki, no por stroba e cliente actual (BCY) di habri un cuenta bancario, of den e caso aki, tene su cuenta bancario habri. Y pesey, Hof a rechasa e peticion di e banco pa suspende e ehecucion di e sentencia previo. Cu esaki pues, e cuenta bancario mester keda habri. 

REACCION ODUBER

Segun Otmar Oduber den un reaccion cortico pa e portal aki  ta ‘claro cu e sentimiento ta uno di restablece trankilidad pa por sigi traha y hiba e compania dilanti’. Oduber a recorda cu Bochincha, entre e 11 inversionistanan, ta emplea 107 empleado directo y ta cumpli cu tur su debernan cabalmente. E ta referi tambe na e parti unda cu Hof tawata hopi categorico cu banco no por a prueba cu tin nada robez y ta haña cu e interesnan di BCY ta pisa hopi mas cu esun di banco. Oduber ta lamenta si cu e banco a recuri na puntonan cu no ta cuadra cu e realidad den e caso aki, pero ta contento cu esakinan a keda bari foi mesa, paso su unico interes ta pa sigi haci negoshi y pa tin un bon relacion cu e banco, manera semper tawata e caso durante hopi aña. Por lesa e sentencia AKI.