CBS: A conta mas di 1500 cas den un siman den e ‘natelling’ di censo

ORANJESTAD  Te cu 10 di maart 2021 un total 1.572 hogar y 4.260 persona a wordo conta. Oficina Central di Estadistica (CBS) a duna un update di e ‘Natelling di Censo2020’ cu a cuminsa dia 3 di maart ultimo.

E Natelling ta encera cu 75 tellers ta bishitando adresnan cu no a wordo bishita ainda pa e conteo di Censo2020. E meta ta pa fin di maart 2021 yega na un conteo completo tur persona y hogar na Aruba.

CBS kier a tuma e oportunidad pa pidi e cooperacion di tur hogar cu ta wordo acerca door di un di nos tellers pa coopera cu e conteo. Den caso cu un teller no encontra un persona na cas pa por haci e entrevista, e lo laga atras un visitekaartje. Por fabor tuma contacto sea cu e teller of cu CBS pa haci un cita pa haci e entrevista. 

Tambe CBS ta haci un apelacion na e publico en general pa trata nos tellers cu amabilidad y respet. Ban demostra cu nos ta un pueblo amabel y cordial. Nos tellers ta trahando duro pa nos por finalisa e conteo y pa duna tur persona y hogar na Aruba e oportunidad di wordo conta como parti di nos poblacion. Awor mas cu nunca ta di sumo importancia pa haya un bista completo di e desaroyonan cu a tuma lugar den nos poblacion pa asina por planifica a base di datonan real y confiabel y a base di situacionnan actual den nos comunidad. Solamente di e manera aki por planifica pa un mihor presente y futuro pa nos tur.

Pa cualkier informacion por tuma contacto cu CBS na 524-7433, durante ora di oficina of por manda un e-mail na census2020@cbs.aw. E potret ta uno di archivo di noticiacla.