Premier Wever ta preocupa cu cifranan actual di Covid19

ORANJESTAD – ‘Pa mi ta hopi honesto cu bo, ami ta preopupa pa e desaroyo di cifras (di Covid19:red)’. Asina prome minister Evelyn Wever Croes a admiti na noticiacla diahuebs riba e pregunta kico e ta pensa cu e cantidad halto di casonan pa dia a stagna y no kier baha. E reaccion ey mes momento ta mustra cu mientras ta parce cu Aruba ta mustra ‘trankil’ cu e cifranan halto diario, debidamente tin preocupacion. 

CLARIFICACION 

Mes momento e prome mandatario ta bisa tambe si, cu mester ta realista y mira e cantidad di casonan di hende cu ta recupera tambe, y esey ta absorba e parti di e cantidad di casonan nobo . Esey tabata e reaccion di prome minister Evelyn Wever Croes na noticiacla diahuebs mainta riba nos pregunta di e situacion actual na Aruba. 

MEDIDA NOBO

E mandatario a mustra cu teniendo na cuenta, e cantidad halto di casonan nobo pa dia, e positivity rate cu tambe ta halto y e cantidad halto ainda di hospitalisacion, lo a reuni ayera den Crisis Team pa asina determina si ta necesario pa haci cambio na e medidanan, sea pa ahusta esaki of no. Te cu diabierna mainta, no ta conoci kico e situacion di e reunion ey tabata. 

PREOCUPACION

E raiz di e pregunta ta a base di e reaccion diario di usuarionan di e portal aki, ora cu raporta e cifranan diario. E reaccionan ta di sorpresa, lamento y preocupacion serio. Y hunto cu esaki, e loke ta parce di ta un trankilidad den gobierno y Crisis Team, como si fuera e cifranan no ta preocupante y cu ta e ‘normal nobo’. Si compara cu islanan manera Bonaire y Corsou, unda cu cifranan a aumenta tambe drasticamente y cu eynan a opta pa tuma mas medida, compara cu Aruba, (Corsou a cambia orario atrobe di Toque de Queda, ora cu cifranan a aumenta di 6 pa 20, y na Bonaire a escala di nivel 3 pa 5 ora cu cifranan a surpasa 30 caso pa dia), ta bin e pensamento si na Aruba, nos ta mucho ‘laks’. A splica cu Bonaire ta diferente pasobra nan capacidad medico ta mucho mas chikito cu nos, pues ta rekeri medidanan mas fuerte compara cu nos. Y Corsou su cantidad di test ta mucho mas abou y pesey e comparacion cu e isla no ta cuadra. Y ademas, cada isla ta tuma nan medidanan conforme nan maneho. Esey no kier men cu cu na Aruba cos ta wordo tuma mas liviano. Asina e reaccion di e expertonan den Crisis Team tabata.