Minister Sevinger a extende medida temporario pa turista atrobe

ORANJESTAD – Un biaha mas, minister encarga cu asunto di permiso, Benny Sevinger a adapta su maneho pa turista. Como tal awe DIMAS ta informa encuanto maneho di estadia turistico di e mandatario. Esaki ta ensera cu tur turista cu drenta Aruba den e periodo cuminsando den luna di augustus 2014 te cu dia15 di april 2015 ta ser permiti pa keda no mas di 90 dia consecutivo sin mester pidi extension di estadia turistico, teniendo na cuenta alaves cu e no ta surpasa e 180 dia maximo pa aña calendario. Esaki ta significa cu e turista nan aki no mester bin DIMAS pa hasi nan extension di estadia turistico.

Tabata aña pasa cu a surgi e problema di edificio unda cu mester a sera esaki pa algun luna, cu e mandatario a opta pa no perhudica turistanan cu e asunto aki. E mandatario a dicidi e periodo ey pa extende e proceso pa e turistanan no keda perhudica. Ora cu e situacion a normalisa na e edificio na comienso di aña, esaki a keda cambia atrobe. Sinembargo manera por a nota, un biaha mas ta adapta e regla aki, aunke no ta conoci pakico e mandatario a haci esey.