Principe William:’ Nos famia no ta racista!’

LONDON – “Nos famia no ta uno racista”. Asina Principe Heredero Britanico William a bisa den un declaracion oficial diahuebs. E Principe heredero y su casa Katherine diahuebs a kibra silencio riba e entrevista cu su ruman homber Harry y casa Meghan a duna recientemente. Tabata prome biaha cu e Principe a aparece publicamente despues di e entrevista di diadomingo y mesora a probecha pa papia.  

PAPIA CU HARRY

E periodista di e canal di television Sky News (cu ta esun cu a haci e pregunta) a puntra tambe si el a papia cu su ruman Harry caba, William a laga sa cu esey no ta e caso pero e ta planea pa haci esey si. E critica di e asunto ta ora cu Meghan durante e entrevista a referi na e cuestionamento di e famia riba e possible ‘color’ di e prome baby prome cu e la nace (esta Archie), implicando cu por tin algo racista. Y ora cu e entrevistadora Ophra Winfrey a sigui puntra si esey ta enberdad e pensamento, Meghan a confirma cu ‘si’, e ta algo racista.