Corte: WEB por sigui corta salario di trahadonan pa cumpli cu Hulanda

ORANJESTAD – WEB no por haci otro cu sigui aplica e reduccion di salario di 12.6% den 2021. Asina corte a dicta diaranson mainta. E sindicatonan  VWI yS.I.W.A., cada un a entama caso contra WEB pasobra esaki a sigui aplica reduccion di salario di 12.6% den 2021, sin cu tabatin un palabracion haci pa e continuacion aki. Corte awor a dicidi otro y cu WEB por sigui. WEB a pone e reduccion den fondo di FASE.   

E PROTOCOL

E sindicatonan y WEB a cera un protocol for di mei 2020 te fin di 2020 unda cu a keda acorda cu lo aplica e reduccion di salario menciona, pa e trahadonan cu a perde nan trabou debi na e pandemia. E suma corta, lo a bay den e pot di FASE. 

E CASO

E caso a atende e pregunta cu si WEB no por a haci otro cu continua corta den e salario den 2021, despues cu Hulanda a informa Aruba cu pa por haya placa di di tres y 4 tranche, tambe mester mester aplica e reduccion di salario. Corte a dicta lo sigueinte. Corte ta haya cu e no por dicta si e Aruba mester a acepta e condicion impone pa Hulanda. Corte ta sali di punto di bista cu e acuerdo ta legal. Ademas, WEB como compania privatisa, ta un aliado di gobierno y como tal e condicionan impone pa Hulanda ta aplicabel pa WEB tambe. Awor cu e condicion impone ta aplicabel pa WEB tambe, e compania no por haci otro cu sigui aplica e cortamento di salario cu 12.6% segun corte. Segun e ley laboral, tin un parti cu ta permiti bou di circumstancianan imprevisto, manera e pandemia, cu tin cierto sensates, e acuerdo laboral cu e trahadonan riba e punto aki por wordo cambia atrobe. Mientras cu e interes di e trahado ta pisa hopi den e caso aki, esun di WEB pa sigui cumpli cu e condicionan, ta pisa mas fuerte segun corte. Mientras cu berdad no tin palabracion haci pa cu 2021, esaki por wordo haci ainda, segun corte.