Reina Elizabeth tristo pa alegacionan racista den entrevista cu Harry y Meghan

LONDON — Palacio Buckingham diamars a emiti un comunicado cu ta referi na e entrevista controversial cu Principe Harry y su casa Meghan a duna y cu a keda televisa diadomingo ultimo riba e cadena di television mericano CBS. Durante e entrevista ey varios asunto a mira ‘luz di dia’, di cual un di nan tabata e aspecto rasista y cu e pareha a considera como preocupante.  

DECLARACION

“Henter famia ta tristo pa a tuma nota completo di con desafiante e ultimo añanan tabata pa Harry y Meghan”, e carta ta cuminsa na bisa. “Mientras cu algun recuerdo por varia, ta tuma esaki hopi serio y lo wordo atendi internamente” e carta ta sigui bisa. “Harry, Meghan y Archie (yiu di e pareha Real) lo semper ta miembronan stima di e famia”. E hecho so cu Cas Real Britanico (lesa: Reina Elizabeth) a tuma tempo pa atende cu e asunto, ta bisa hopi. 

E ENTREVISTAE entrevista mes a produci por lo menos 6 punto cu cada un riba su mes a bira un asunto. Entre nan, cu famia Real a para sosten financiero na e pareha di un dia pa otro, Meghan a contempla pa comete suicidio, e famia a para tambe proteccion pa e famia,  a coregi un ‘redo’ cu tabata core rond, (Meghan lo a pone su cuña yora), e pareha a casa priva tres dia prome cu e boda publico, e hecho cu tata di Harry a stop di tuma su yamadanan, y mas. Esun mas pio pa Meghan, tabata cu contrario na promesa haci, e cas Real no a ofrece proteccion e.o. contra publicacionan negativo pa e pareha, en particular Meghan. Y el a admiti cu e cas Real a silenci’e.