BCA: E nivel di reservanan internacional a mehora durante 2020

ORANJESTAD - Durante e reunion di 28 di januari 2021 y despues di a revisa e dato economico y monetario mas recien, e Comite di Maneho Monetario (CMM)  di Banco Central di Aruba (BCA) a dicidi pa mantene e porcentahe actual di e tasa di e “reserve requirement” (reserva rekeri) na 7,0 porciento.  E tasa di e reserva rekeri ta e cantidad minimo di reserva cu banconan comercial mester mantene na BCA y ta igual na 7,0 porciento di nan obligacionnan cu ta vence den menos di 2 aña. A considera e siguiente informacion y analisis pa yega na e decision aki. 

RESERVANAN INTERNACIONAL

E reservanan internacional (incluyendo e diferencia di revaluacion di oro y reserva di divisa) a aumenta cu Afl. 428,6 miyon te cu y incluyendo 31 di december 2020, compara cu fin di december 2019. E aumento aki tabata debi na un bahada den importacion causa pa menos demanda di turismo y local, fiansa di gobierno ricibi for di exterior, medidanan di divisa tuma door di BCA y revaluacion di e reserva di oro di BCA causa pa subida den prijs di oro riba mercado internacional. Reservanan oficial di divisa a nota un subida di Afl. 423,1 miyon. Consecuentemente, e reservanan oficial y e reservanan internacional a crece te na, respectivamente, Afl. 2.207,9 miyon y Afl. 2.356,6 miyon na final di december 2020. Di e manera aki e nivel di reservanan a keda adecua ora di compara nan cu e nivel critico di 3 luna di pago registra ariba cuenta coriente y e metrico di ARA  di IMF  

DESAROYONAN DEN CREDITO

Den december 2020, credito total a baha cu Afl. 50,6 miyon of 1,3 porciento, compara cu fin di 2019. Esaki tabata relaciona principalmente cu e componente “otro”, cu a nota un caida di Afl. 59,2 miyon (-10,3 porciento), door cu bono di gobierno manteni den portfolio di banconan comercial a vence. Contrariamente, e componente “fiansa na individuonan” a contribui positivamente na e credito total (+Afl. 18,6 miyon/+1,0 porciento), principalmente door di fiansa pa hipoteca di cas. E componente “fiansa na empresa” a baha cu Afl. 10,1 million (-0,7 porciento), cu ta e resultado di un demanda mas abou pa credito ariba cuentanan coriente. 

INFLACION

Inflacion, basa riba CPI,  tabata 2,7 porciento mas abou na november 2020 compara cu e mesun luna di e aña anterior (Grafico 2). Esaki tabata primordialmente causa pa prijs mas abou di gasoline y un reduccion den tarifa di coriente. E promedio di inflacion di 12 luna a baha te na -0,8 porciento na november 2020, compara cu e nivel halto di 4,3 porciento registra na juni 2019. E promedio di inflacion di 12 luna, excluiendo e componentenan di energia y cuminda, tabata 0,4 porciento na november 2020. 

LIKIDES PRUDENCIAL

E likides prudencial di e banconan comercial (33,0 porciento), cual ta midi e cantidad di activo likido compara cu e activo total netto di e banconan comercial, a keda na un nivel comfortabel den november 2020, compara cu e likides minimo rekeri di 15,0 porciento.