Aruba a registra 29 caso di variante Britanico mas y 1 di Brazil

ORANJESTAD -  Crisis Team ta informa comunidad di Aruba cu RIVM a identifica 29 caso mas di e variante di Reino Uni y prome caso di e variante di Brazil presente na Aruba. Manera ta conoci testnan positivo di Aruba ta wordo manda tur siman Hulanda pa wordo analisa. Diabierna ultimo e total di casonan di e variante di Reino Uni tabata na 21 y awo cu 29 caso mas e total a bira 50.

Segun RIVM ta analisa mas lote di test mas variante por wordo identifica. Un mensahe ta bay na comunidad pa sea extra cauteloso y sigui cumpli firmemente cu e reglanan di distanciamente fisico y social, uzo di tapaboca y laba man frecuentemente. E variantenan aki ta mas agresivo y ta acelera e proceso di infeccion cu por causa problemanan serio di salud y compromete e capacidad di cuido na Hospital. Durante e ultimo luna nos por a mira un reduccion di casonan activo, Sinembargo si no sigui cumpli casonan ta bolbe aumenta.