E bentana pa tin algo carnavalesco ainda pa 2021 na Aruba ta cerando

SAN NICOLAS – Tur cos ta mustra cu e aña aki, contrario na pensamento inicial, Aruba lo toch no celebra nada nada di carnaval 202q1. Ni den e forma minimo manera cu kier a purba cu p.e, un tipo di fakkel pa mucha y uno pa hende grandi den luna di juli di e aña aki. Asina mes, e presidente di e fundacion cu ta maneha carnaval SMAC, Jason Brown, no ta cla pa entrega ainda. Otro siman tin reunion cu e group leaders pa asina determina kico ‘ainda’ por bin cu ne, pa toch no laga e aña aki pasa sin tin aunke ta ‘algo’ pa celebra carnaval. 

COVID19

Manera ta conoci, Carnaval manera cu nos conoce, a keda cancela e aña aki debi na e pandemia. Algo cu tur caminda a sosode, hasta na Brazil, e mecca di carnaval. Loke ta diferente, ta cu Aruba kier a haci maske ta un of dos parada casual pa toch celebra ‘algo’. Segun sr Brown, mester pensa den direccion di un tipo di fakkel optocht, uno pa mucha y uno pa adulto, ya cu e ora tin algo, aunke no costoso. Placa obviamente ta un factor, pero e chispa di carnaval tambe tey. Por lo menos den un grupo grandi di persona segun Brown.

CAMBIO

E siman cu a pasa, e ultimo posibilidad di tin algo di carnaval, a practicamente cay na awa ora cu durante un reunion entre SMAC y minister di Cultura, a bira hopi cla cu e posibilidadnan pa tin algo ta minimal. Sr Brown diabierna den un entrevista cu noticiacla, a admiti cu e intencion di bin cu dos parada, ta for di mesa. Pero algo manera un tipo di evento virtual, ta riba mesa ainda. E ta algo cu no ta mustra mucho cla, pero ta riba mesa ainda. E decision final lo mester cay pa fin di luna di maart, y despues si esey resulta den un cancelacion completo, tin cu cuminsa traha pa 2022. Pero esey tambe ta colgando na un hilo. Esaki pasobra pa tin algo pa 2022, for di augustus mester tin algo concreto pa por planea e carnaval di un forma drechi. Pues si pa augustus of mas tarda, September di e aña aki no keda cla tampoco, ta mustra cu pa 2022, tampoco lo tin carnaval. 

ANIMO

For di un grupo di persona cu e portal aki a papia cu ne, a mustra cu mester simplemente cancela henter e idea di tin algo di carnaval pa 2021. Hasta di hendenan cu tin carnaval den nan sanger. Nan ta prefera pa cancela tur cos y bin cu algo drechi y normal e siguiente aña. E periodo a pasa caba, y nos ta den un otro ambiente awor. No tin nodi di forza algo, y sigur no awendia unda cu hopi no tin e placa pa gasta na e carnaval. Hasta di esnan cu por ‘afford’ esaki, ta bin gritonan pa djis cancela cos y bin cu algo normal otro aña. De hecho, aworaki no tin tempo pa pensa riba Carnaval, sino riba e impacto cu Covid19 tin riba nos comunidad. Hendenan cu ta contagiando, muriendo, y ta luchando pa sobrevivi financieramente. Y cu no ta e tempo pa pensa riba e luho di carnaval, aunke con inculca esaki ta den nos cultura.