Aruba ta yegando 10 mil hende vacuna caba contra Covid19

ORANJESTAD – Aruba ta yegando e cifra di 10 mil hende vacuna pa Covid19. Te cu 4 di maart 2021 segun cifra divulga pa Departamento di Salud (DVG), un total di 9573 persona a vacuna, di cual casi 8000 (7922 total) tabata di e grupo do 60+. Tambe e cantidad di registro total ta 25192 persona di cual 11097 ta di e grupo di 60+. Pa logra e meta mas ainda, a organisa un dia nacional di registro pa vacuna diasabra awor na tur e centronan cu ta operacional. 

VACUNA TA CABA?

Segun minister Dangui Oduber diadomingo cu a pasa, pa diasabra awor (mayan) e prome lote di vacuna ricibi, lo mester caba. Te cu awor tin 2127 vacuna ainda, y si tene cuenta cu pa dia mas of menos ta vacuna 800 pa 1000 persona, por ta cu enberdad pa diasabra awor, e prome lote lo por caba diadomingo. 

GRUPO DI 60+

E grupo di 60+ na Aruba 17 mil persona. Esey kier men cu segun e cifranan ricibi, falta mas of menos 5903 persona di 60+ cu no a registra ainda.