Wever: Lo trata problema di Emmaschool den Conseho di Minister

Wever: Lo trata problema di Emmaschool den Conseho di Minister

Posted on 03/5/2021 9:36 am AST | Updated on 03/5/2021 9:37 am AST

ORANJESTAD - Diahuebs mainta Prome Minister Evelyn Wever-Croes a ricibi sindicatonan SIMAR y SEPPA hunto cu docentenan di Emmaschool cu tabata na Bestuurskantoor pa expresa diferente preocupacion cu nan tin relaciona cu plannan di Minister di Enseñansa Rudy Lampe pa ‘fuseer’ / uni, e scolnan Paso pa Futuro y Emma. 

Premier Wever-Croes a expresa cu a tuma nota a traves di prensa, cu tabatin preocupacionnan andando pero no a haya un oportunidad pa ‘verdiep’ den e problematica. Sinembargo e grupo a presenta na Bestuurskantoor y a pidi pa atencion, pa cual Prome Minister a ricibi e carta. Den e carta nan ta duna splicacion di e situacion y ta pidi pa mas tarda diamars awo, bin un decision si ta para e fusion di e scolnan si of no. 

Segun Prome Minister a splica, e ta dificil pa bisa dibiaha si ta para algo cu tin di haber cu enseñansa, considerando e responsabilidad politico cu e Minister di Enseñansa tin cu carga. Y como Prome Minister ta boga pa e principionan di bon gobernacion wordo aplica y si ta trata cambionan grandi den maneho, cambionan cu ta afecta eseñansa especial negativamente, esey ta cosnan cu tin cu vela pa no pasa. 

Durante e reunion a scucha algun di e argumentonan cu e sindicatonan a trece dilanti y a comparti e plan cu sr. Lampe a traha cual e sindicatonan a indica di no a ricibi e plan aki. 

“Mi tambe ta bay studia e plan y mi por bisa cu enseñansa special ta enseñansa cu ta hopi cerca di mi curason y nos muchanan special mester di hopi atencion. Ademas e trabou cu ta wordo haci pa enseñansa special ta grandisimo, p’esey e ta lamentabel pa mira e tension cu tin aworaki. Mi lo haci mi maximo esfuerso posibel pa trece trankilidad den enseñansa special pasobra nos muchanan mester di trankilidad pa atende cu e retonan diario cu nan tin”. 

Premier Wever-Croes a conclui bisando cu lo trata e tema den Conseho di Minister y pa otro siman lo mester tin solucion.

 

  • Partido politico PPA a presenta su lider nobo Lissette Malmberg

    Partido politico PPA a presenta su lider nobo Lissette Malmberg

    SAN NICOLAS – Cu 10 siman faltando pa eleccion parlamentario 2021 di Aruba, partido PPA a presenta su imagen y lider nobo diahuebs anochi. Den un bachi nobo, y na e sede ‘bieu’ di e partido, e conocido comerciante y pastor religioso sra Lissette Malmberg a keda presenta como e lider nobo di e partido. Sra Malmberg den su discurso, a sigura cu e movimento ta cla pa convence ‘ciudadonan’ manera e mes a yama e votadornan potencial pa e partido, pa ‘bay parlamento’, esta pidiendo nan pa uni cu e partido den su bachi nobo. Basa riba 7 principionan fundamental, Malmberg kier trece e cambio cu mester pa logra trece Aruba dilanti atrobe.

  • Den 4 siman Quanten Consortium ta duna contesta definitivo

    Den 4 siman Quanten Consortium ta duna contesta definitivo

    ORANJESTAD - Den 4 siman e consorcio cu yama Quanten Consortium por duna un contesta definitivo si nan ta bay sigui cu e plan di reapertura di refineria di Aruba. Asina prome minister Evelyn Wever a bisa diahuebs despues di a reuni cu e dos personanan en cuestion Jeff Meyers y Karl Welch. E portal aki no por a verifica informacionan suministra pa e dos personanan aki, y ta meramente inform e loke cu e la ricibi di parti di gobierno. 

  • Sevinger: ‘Probablemente den e dianan aki nan ta bay boei mi, detene mi’

    Sevinger: ‘Probablemente den e dianan aki nan ta bay boei mi, detene mi’

    ORANJESTAD – Parlamentario pa partido AVP Benny Sevinger a indica diamars atardi cu e ta conciente cu den e proximo dianan e lo por bira e proximo persona deteni den e caso penal Avestruz (e caso cu ta trata di delitonan di corupcion y otro hechonan castigabel  rond di dunamento di tereno den erfpacht entre 2009 y 2017). ”Probablemente den e dianan aki, nan ta bay boei mi, detene mi, whatever. Mi no ta bay huy” Sevinger a bisa, indicando cu e ta cla prepara pa ora cu e momento aki yega pa nan ‘bin busk’e, manera cu ta ‘buscando’ e otro sospechosonan den e caso. Mientras cu Sevinger a indica cu e lo por ta 'proximo', esey ta speculacion di su parti y no necesariamente e caso, manera cu e portal aki a compronde. Fuera di Sevinger y esnan deteni, tin mas persona cu ta mira como sospechoso y cu a haci entrada hudicial, cu lo por wordo yama prome. Tur cos ta den man di Ministerio Publico. 

  • A inaugura e servicio na IMSAN di hospital temporal

    A inaugura e servicio na IMSAN di hospital temporal

    SAN NICOLAS – Manera e portal aki a informa caba awe mainta, awe tardi Instituto Medico San Nicolas por pone añadi como nan servicio, cu nan por fungi como un hospital temporal tambe. Segun minister di salud Dangui Oduber, awe ta un dia historico pa imsan, un dia cu Imsan ta logro otro milestone importante den e masterplan di ImSan. Segun e mandatario, nos tur por corda con imsan a cuminsa y kiko tawata e vision e tempo ey pa cu imsan. E mandatario a mustra cu Gabinete Oduber 3 a cuminsa e proyecto di imsan cu e vision pa un dia imsan bira un hospital y pariba di brug tin su propio hospital.

  • Wever: Tin 7 persona cu no ta bolbe riba lista di MEP e biaha aki

    Wever: Tin 7 persona cu no ta bolbe riba lista di MEP e biaha aki

    ORANJESTAD – Partido politico Movimento Electoral di Pueblo (MEP) tin 7 (shete) persona cu no ta bolbe riba e proximo lista pa eleccion 2021. Asina e lider di partido Evelyn Wever Croes a bisa dialuna mainta durante un conferencia di prensa unda cu a presenta nan prome candidato nobo. Ademas tabata interesante pa wak den fin di siman kenan sigur ta bin bek. Entre nan, uno cu a specula ariba cu e lo no bolbe, cu ta Chris Romero. Pero Romero ya caba a confirma na e portal aki cu rumornan cu e lo retira na mei, simplemente no ta berdad.

  • Crisis Team ta pidi politiconan evita bishita cas pa cas pa core campaña

    Crisis Team ta pidi politiconan evita bishita cas pa cas pa core campaña

    ORANJESTAD – Core campaña electoral e biaha aki ta bay ta diferente. Por lo menos esey ta e intencion. Si ta pa Crisis Team, politiconan no por bay cas pa cas manera cu e tradicion ta conoci p’e. Tur esaki debi na e pandemia y usando Corsou como ehempel, por mira con si no cuida, e situacion por bay for di man. Cu e situacion actual, manera ya anuncia, e reglanan cu ta vigente pa e proximo dos siman, ta prohibi bishita ‘no familiar’ na cas. Mes momento a bisa cu ta conciente cu no por pone polis na cada cas pa controla, pero gobierno y Crisis Team ta spera cu por conta cu e disciplina civico. 

  • Powered by SETAR