RIVM: Tin 7 caso mas positivo di variante Britanico na Aruba

ORANJESTAD – E siman aki (diamars) Hulanda a informa Aruba cu a detecta 7 caso nobo mas di e variante Britanico na Aruba. Esaki ta valido pa e ultimo dos siman cu a pasa. Asina prome minister Evelyn Wever Croes a informa noticiacla diahuebs durante conferencia di prensa. Cu e shete nan nobo, total Aruba (taba)tin 21 caso total. Tabatin pasobra mientrastanto tur e casonan ta di hende cu a recupera di e virus caba. Esey no ta kita afo cu e variante tambe a plama, aunke segun e mandatario, e no a plama mes hopi cu a kere. Informacion cu e portal aki tin sinembargo, ta bisa otro.   

PROBLEMA CU HULANDA

Riba pregunta di e portal aki, pakico diripiente no ta anuncia semanalmente mas riba casonan positivo di e variante siendo cu esey tabata e palabracion, e mandatario a culpa Hulanda pa e fayo ey. Segun e mandatario, ta te diamars cu a pasa, (2 di maart) Hulanda a informa Aruba di e casonan ‘nobo’ aki. Pero pa varios siman no a informa nada y e ora Aruba tambe ta lubida di puntra mas e ora. E ta un sistema complica segun Hulanda, cu e mandatario mes no por a splica, di e loke el a tende diamars, pero a dicidi di envez di un comunicado diaranson, pa suministra e informacion di e variantenan nobo aki  diahuebs den un conferencia di prensa. E mandatario a bisa mes momento cu e variante na Aruba no ta plamando mes hopi cu a kere inicialmente. 

INFORMACION DIFERENTE

Informacion sinembargo diferente cu e portal aki tin, ta mustra cu varios scol a keda afecta, y mientras cu no kier bisa esaki publicamente, lo ta trata di e variante cu ta plamando mas lihe y pesey varios mucha ta hayando esaki. E portal aki por confirma cu tin por lo menos un scol unda cu prome tabata docente cu a test positivo pa cual a manda henter un klas cas pa dos siman. E klas a reanuda despues di 2 siman, solamente pa confronta un alumno cu a test positivo. Atrobe mester a manda henter e klas cas. Tambe tin casonan pero cu ta bon sera, na otro scolnan grandi, pero unda cu e informacion ta hermeticamente cera.