Wever: Medidanan contra Covid19 lo keda na vigor por lo pronto

ORANJESTAD – E presencia di e variante Britanico di Covid19 (a raporta 7 caso extra diahuebs pa un total di 21 caso total di variante nobo), cantidad halto di hospitalisacion y morto pa e virus, ta e motibo(nan) cu no por papia di suavisacion di e medidanan actual contra e virus. Asina prome minister Evelyn Wever Croes a contesta noticiacla diahuebs durante un conferencia di prensa. Segun e mandatario, no ta bay anuncia cada bez manera otro islanan ta anuncia updates, pero ta dicidi un biaha pa siman y ora cu tin cambio, lo anuncia esaki. 

CAMBIO

E pregunta a bin a raiz di e forma con antes tabata update cada siman riba e situacion di medida y con of kico lo a haci rond di esaki. A compara  otro paisnan cu cada bes ta pone un fecha riba cual ta sea suavisa of aumenta medida. Pero na Aruba, segun e mandatario, cada tres dia ta tuma decision. 

MENOS CASO, MAS MORTO

Mientras cu di un forma, ta mustra cu e cantidad di casonan ta bahando, e cifra di hospitalisacion y morto ta alarmante segun e mandatario, pues esey ta pone cu no ta bay mishi ainda cu e cifranan. Esey kier men cu tur medida cu ta na vigor, por lo pronto ta keda na vigor, cu ta inclui e Toque de Queda.