Arends: AVP a vota contra cambio di LTU pasobra e ta discrimina

ORANJESTAD – Pasobra cu nan ta considera cu e ley ta discriminatorio, fraccion di partido AVP a vota contra. Asina miembro di fraccion di e partido berde Richard Arends a bisa noticiacla diaranson mainta, refieriendo na e ley cu a pasa ayera riba cambionan den e Landsverordening Toelating & Uitzetting (LTU). E resultado di votacion tabata 12 pro y 9 contra, y e 9 nan ta di AVP. Ayera Parlamento a trata poues e ley (LTU) e ley cu ta regarda cambionan fundamental di e Landsverordening Toelating & Uitzetting, specificamente e parti cu tin cu permiti famia di hulandesnan den servicio di Pais Aruba of cualkier otro instancia hulandes pa biba y traha na Aruba sin problema. E parti aki tabata un di e condicionan imponi pa Hulanda den e acuerdo cu Aruba firma aña pasa pa e Landspakket pa asina Aruba sigui haya ayudo. Y aunke cu e tabata un condicion di Hulanda, AVP no ta di acuerdo y no por a haya su mes pa aproba esaki. 

DISCRIMINACION

Segun sr Arends, nos mesun yiunan di tera mester pasa den un cantidad di screening prome por registra nan casa cu no ta naci na Aruba. “ Arubianonan den servicio di Pais Aruba cu ta casa cu un persona naci pafor di Aruba no ta haña e mesun trato preferencial cu e ley ta duna” sr Arends a bisa. Segun e parlamentario, e ley ta duna preferencia di admision na un cierto grupo di persona di nacionalidad Hulandes cu ta den servicio di cualkier instancia Hulandes hunto cu nan famia completo pa por biba y traha na Aruba. E admision preferencial aki tambe ta conta pa nan pareha (of mas) si nan ta cu otro pa mas cu 6 luna, pero no ta casa y ni tampoco registra formalmente.

PERMANENTE

Manera cu ta conoci y cu noticiacla a raporta inicialmente, e cambio aki ta un exigencia cu Hulanda a pone pa Aruba acepta relaciona cu e Landspakket. Pero segun Arends, Gobierno no kier admiti, e cambio di ley aki ta forma parti di esey. E ley cu a wordo trata ayera ta stipula e reglanan nobo di admision di Rijksambtenaren di manera permanente, mientras cu e COHO y landenpakket ta algo temporal. E reglanan pa admision di grupo aki por a wordo regla facilmente a base di maneho existente. Den pasado tabata regla admision di personanan cu no ta naci na Aruba individualmente pa cada instancia en cuestion y no di un manera general manera cu e ley ta propone awe. Riba pregunta di e portal aki, cu si e ley tabata valido solamente pa e tempo cu COHO ta valido, si e ora si AVP lo a vota pro, a bisa cu no, pasobra e ta ley ta keda discriminatorio. E permanencia of temporalidad ta secundario segun sr Arends. 

AVP A HACI MESCOS TEMPO DI LAFT

Partido MEP ta alega cu AVP no a vota pro, mientras cu tempo cu nan tabata na mando (AVP:red) nan a haci mescos y a acepta pa miembronan di p.e., CAFT haya e derechonan aki. Aki sr Arends a admiti cu esaki ta berdad.  “Esey ta berdad, pero den pasado tabata regla admicion di personanan cu no ta naci na Aruba individualmente pa cada instancia en cuestion y no di un manera general manera cu e ley ta propone awe” Arends a bisa. Y specificamente fuera di CAFt, tabata regl’e individualmente pa Hof y Kustwacht etc. Ademas, segun sr Arends, Hof y Kustwacht ta instancianan di Reino, no di Hulanda, mientras cu CAFt ta di Aruba. Potret cortesia AVP.