Docentenan di Emma School no ta acepta actitud di minister

ORANJESTAD – Docentenan di Emma School ta hopi rabia cu e minister di enseñansa Rudy Lampe y no ta descarta cu den e dianan aki nan lo reacciona den un forma cu nan ta considera corecto. Kico e reaccion aki ta, nan no kier a divulga pero no ta exclui un caso hudicial of un of otro accion. Asina presidente di sindicatoi di maestro Simar Josephine Albertus a bisa diaranson mainta durante un conferencia di prensa riba e tema. E sindicalista a trata e corespondencia entre e scol y e mandatario. 

E SITUACION

Segun sra Albertus, un dia prome (diamars) a ricibi contesta di un carta cu e sindicato a manda pa asina haya sa informacion necesario riba e.o. e plan di fusering di e scol. Pero e contesta cu a drenta ayera di e minister, pa e sindicato tabata inaceptable. A considera e contesta como uno no professional y mas bien ‘ridiculo’. Segun sra Albertus, e minister a bisa cu e no debe e sindicato ningun splicacion ya cu ta na Parlamento e tin cu duna cuenta y no sindicato. Ademas e mandatario a referi na un reunion recien unda cu a papia 4 ora cu e sindicato y esey lo mester ta suficiente. Ademas a ‘bolbe’ recorda e sindicato riba e punto di ‘no work, no pay’, indicando cu si welga, esaki lo costa e docentenan en cuestion. Sra Albertus ta considera e contenido di e carta y e actuacion di minister, como uno dictatorial y cu asina nan ta hopi leu foi cas. “E ta un ridiculez di marca mayor” sra Albertus a sigui bisa. A sigura cu e docentenan presente di Emma School lo no acepta e actitud aki y ta bay bin cu un reaccion corecto pa e minister dentro di poco.