Limitacion deportivo na Aruba debi na pandemia a afecta Xander Bogaerts

BOSTON – Limitacionan deportivo na Aruba debi na e pandemia aña pasa, a afecta e pelotero professional Xander Bogaerts.   Bogaerts a wordo saca di e lista di hungadornan di Boston Red Sox temporalmente debi cu su schouder ta stijf. Esaki ta resultado di e programa di entrenamento di Bogaerts na Aruba durante su tempo liber, segun e manager Alex Cora.  Segun Cora, el a haci lihe cu e programa di tiramento (di bala) na Aruba. Debi na e limitacionan presenta riba e isla pa motibo di e pandemia, e por a dal bala pero e parti di tiramento (di bala) a afecta Bogaerts. Como cu e no tabatin suficiente oportunidad, e poco tempo cu el a haya pa hacie, el a hacie lihe cu e consecuencia cu awor e tin problema cu su schouder. Cora no ta kere cu Bogaerts lo ta for di alineacion hopi largo y cu pa tempo cu e temporada inicia, cu e lo ta cla. Mientrastanto Enrique Hernandez a reemplaza Bogaerts durante weganan di fogeo durante Spring Training.