- AZV: Otro luna tin traspaso automatico di clientenan di dokter Vink pa HOED Piedra Plat
- SETAR a tene su Avigilon ALTA Launch Event cu enfoke riba e futuro di seguridad
- Grupo grandi di ex studiante tin problema pa paga nan Duo lening bek
- CBS: Bestaansminimum a subi atrobe na Aruba debi na aumento di gasto di cuminda
- Figaroa: Proximo gobierno mester consisti di solamente vakministers
WEB Aruba ta inicia exploracion di posibilidad di adkiri gas cu Eagle LNG
ORANJESTAD – Un di e obhetivonan pa logra WEB Aruba su vision di yega na un produccion ‘Cleaner, Greener and Fuel Oil Free’ ta pa elimina por completo e uzo di Heavy Fuel Oil (HFO) como fuente di energia. Asina e compania ta bisa den un comunicado. Mescos cu tempo di introduccion di tecnicanan manera SWRO y energia di biento y solo, un biaha mas WEB Aruba tin cu para keto y evalua kico ta e mihor desicion pa logra e obhetivo na beneficio di Pais, comunidad y WEB Aruba. Pa kita tur incertidumbre y pa tuma un decision responsabel, gerencia di WEB Aruba desde 2017 a forma un programa pa studia tur posibilidad, riesgo y paso cu mester tuma pa introduci cambionan exitosamente. Considerando e actual desaroyo di Gobierno di Aruba pa negocia construccion di un terminal pa distribucion di LNG cu e compania Eagle LNG, WEB Aruba a dicidi di pone un paro na su programa di sondeo pa introduci LNG. Gerencia di WEB Aruba awo lo bay inicia e proceso di exploracion di e posibilidadnan di adkiri gas pa WEB Aruba cu e compania Eagle LNG. Lo sondea den ki forma y na ki prijs por cumpra LNG pa uzo di e gas den planta.
INFLUENCIA Y PROTEHA PRODUCTO
No ta por nada a formula e obhetivo pa elimina por completo e HFO como fuente di energia pa produccion di electricidad. E obhetivo ta pa influencia e producto y prijs cu WEB Aruba ta ofrece, cu e meta pa keda competitivo pa clientenan. P’esey WEB Aruba su team di diferente expertisio, a bin ta coordina sondeonan pa adkiri gas natural y converti e proceso di produccion di coriente pa opera riba gas. E sondeonan tawata hopi amplio y no solamente a enfoca riba e parti tecnico, financiero y huridico, pero tambe riba ki impacto cambionan grandi asina ta trece pa WEB Aruba su forma di operacion.
Prome cu a tuma cualke decision, a delibera cu tur stakeholder, esta cu accionista, cu staff, sindicato, empleadonan, y last but not least, cu representantenan di cliente y otro gremionan externo. A haci e sondeonan segun un programa reconoci internacionalmente cu ta coordina, dirigi y premira implementacion di un set di proyecto relata na otro y actividadnan pa logra resultado y beneficio relaciona cu e obhetivo strategico di elimina HFO for di WEB Aruba su produccion. A pasa fasenan di inventarisacion di informacion di entre otro bendedornan di gas natural y companianan di utilidad cu ta traha cu gas caba pa asina haña un idea kico ta e consecuencianan pa tur envolvi.
RETRASO
Ehecucion di e programa pa a yega na e tumamento di decisionnan corecto pa WEB Aruba y consencuentemente pais Aruba, a sufri gran retraso durante e pandemia pa motibo cu WEB Aruba a hay’e ta cambia su prioridadnan financiero. Consecuentemente mester a pospone e programa pa introduci LNG na WEB Aruba te proximo aviso.
Considerando cu Gobierno di Aruba, cu ta e accionista principal di WEB Aruba, a inicia un proceso pa negocia construccion di un terminal pa distribucion di LNG, WEB Aruba a dicidi pa termina su propio programa di sondeo pa introduci LNG. Dentro di poco, gerencia di WEB Aruba lo inicia e proceso di exploracion cu e compania Eagle LNG.
SETAR a tene su Avigilon ALTA Launch Event cu enfoke riba e futuro di seguridad
CBS: Bestaansminimum a subi atrobe na Aruba debi na aumento di gasto di cuminda
ORANJESTAD - E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0- 15 aña). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).
WEB Aruba ta firma acuerdo cu Seven Seas Water Group pa construi planta SWRO-3
ORANJESTAD – Diaranson dia 17 di mei ultimo, WEB Aruba y Seven Seas Water Group (SSWG), un proveedor multinacional di ‘Water-as-a-Service® (WaaS®) solutions’, a firma un acuerdo Build-Own-Operate-Transfer (BOOT) cu un termino di traspaso di 10 aña. Seven Seas Water (Aruba) VBA lo construi un planta di SeaWater Reverse Osmosis (“SWRO”) cual lo contribui cu un minimo di 16.500 meter cubico di awa potabel pa dia. E asina yama SWRO-3 lo ta parti di WEB Aruba su plan di termino largo y su Water Road Map pa satisface demanda continuo di awa, manteniendo suministro confiabel. E planta nobo lo reemplasa e actual facilidad temporal di produccion di awa. SSWG a haya e contrato despues di un proceso di tendering y negociacion na 2023. Lo construi e planta SWRO-3 riba tereno existente di WEB y ta planea pa cuminsa opera pa medio 2026.
Banco Central ta mantene e tasa di reserva obligatorio na 22,0 porciento
ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente serca di e limite minimo di e ARA, apesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.
Schlipken: Aruba ta spera 18 mil turista Brasilero den 2024
SAO PAOLO – Aruba ta spera 18 mil turista Brasilero den 2024. Asina e director di turismo di ATA pa Latino Americano, Jordan Schlipken Croes a declara e siman aki na e portal PANROTAS, durante e evento WTM Latin America na Sao Paolo. Segun Croes, Brazil ta e di tres mercado Latino mas grandi pa Aruba, despues di Colombia y Argentina. Ta mustra cu na 2023 tabatin 14 mil bishitante di Brazil pa Aruba. Segun Croes, un di e motibonan di e cifranan grandi aki, ta e gastonan di e Brasileronan den e pais. Pa por yega e cifra di 18 mil Brasilero, Aruba tin 4 strategia principal pa e pais, fuera di e participacion na e bolsa di turismo Brasilero. Esaki ta e.o. incentivonan cu e operadornan y agente di biahe, ya cu 70% di Brasilero cu ta biaha pa Aruba ta cumpra nan pasashi via agentenan di biahe.
Aeroliña Mericano a reduci prijs di pasashi pa Aruba cu 50% e siman aki!
BOSTON – E aeroliña Mericano conoci pa tarifa reduci, JetBlue a reduci su tarifa mas ainda, cu 50% pa biahero pa e.o. Aruba. Nan ta yame un deal special di 2 dia ‘Hit Refresh’, unda cu dentro di e dos dianan aki, e biaheronan mester cumpra e pasashi. Por usa e biahe entre 7 di mei pa 12 di juni y no tin asina yama ‘blackout dates’ osea dianan cu bo no por biaha. Pa Aruba e prijs a wordo reduci cu 50% di p.e $776 dollar te na $378 round trip. No ta algo inusual y ta algo cu nan ta haci frecuente, pero ta sigui interesante. Tur e pasashinan tin cu origina for di Boston.
Follow NoticiaCla
