Parlamento a aproba Codigo Civil nobo e.o. implementacion controversial pa registra union civil

ORANJESTAD – Despues di mas of menos 5 ora di debate, Parlamento cu 17 voto pro y 4 contra, a aproba e introduccion pa e cambionan cu Parlamento aproba na 2016 cu ta inclui partinan nobo den Buki 1 (derecho personal y familiar), Buki 3 (derecho di propiedad), Buki 4 (derecho di herencia) y Buki 7 (acuerdonan special) di nos Codigo Civil, y e punto mas controversial, e registracion di union civil, mas concreto registracion di parehanan di mesun sexo den un union civil.

VOTONAN

Interesante tabata pa sa ken tur ta pro y contra, particularmente pa e parti di e registracion di union civil. Na final, mayoria a vota pro, y 4 (dos di MEP y 2 di AVP) a vota contra. Esnan di MEP cu a vota contra ta Hendrik Tevreden y Darlaine Guedez Erasmus, mientras cu pa AVP Robert Candelaria y Marlon Sneek a vota contra. 

POSPONE

Ora cu recientemente a bira conoci cu Parlamento a pospone e tratamento di e ley aki ‘te proximo aviso’, esaki a causa un ola di reaccion di gruponan cu ta sostene union civil pa parehanan di mesun sexo. Fuera di e parti di registracion di union civil, tin un cantidad di otro asunto cu tambe lo conoce cambio cu tambe ta na beneficio di comunidad, manera: reglanan nobo pa seleccion di fam, derecho di propiedad matrimonial, derecho di huur, contratonan laboral, determinacion hudicial di paternidad y e reglanan nobo na ora di reconoce un yiu.