Polis mester a para varios fiesta ilegal den weekend

ORANJESTAD – Den fin di siman varios grupo di persona na Aruba a dicidi di ‘burla’ atrobe di e reglanan stipula pa e.o. bringa e contagio di Covid19. Tabatin varios fiesta ‘clandestino’ unda cu tabatin aglomeracion di hende den apartamento y of casnan na Aruba, unda cu polis mester a interveni. Varios caminda tabatin polis cu a logra kibra e fiesta pero tambe tabatin otro caminda cu esaki no a sosode, debi cu nan lugar no tabata conoci.

PALM BEACH

Na un di e fiestanan na un compleho di apartamento na Palm Beach, den un apartamento particular, polis a haya contesta di algun cu nan (esnan di e fiesta) no por a move, pasobra tabatin TDQ dus obliga di keda fiesta te ora cu e TDQ pasa. A compronde cu polis a scual nan tur, a busca patruya extra cu zwaailicht, cu a pone esnan den e fiesta pensa dos biaha y a bandona e sitio mesora rumbo pa cas. No ta conoci si esnan cu a wordo gara, a haya multa.

SIVIDIVI

Na un cas na Sividivi den oranan di diadomingo marduga, tambe polis a haya un grupo di 10 pa 15 homber y muher ta bebe y tabata goza cu musica duro. Polis mester a aleha e grupo aki for di otro, pasobra nan tabata viola e regla di samenscholing. No a duna multa aki nan. 

DVG

E portal aki a compronde cu DVG ta na altura y ta preocupa cu esaki por nifica cu dentro di poco e resultado por ta ‘negativo’ pa Covid19 esta cu den e caso aki negativo kier men cu e cifranan positivo lo por aumenta. Nan ta teme cu esaki por ta e situacion lamentablemente. 

CORSOU

Na Corsou no tabata mucho mas miho unda cu eynan polisnan a haya nan mes ta para un fiesta riba Klein Curacao. Aparentemente un tip a drenta y a manda un avion di warda costa bay bula riba e isla. Y enberdad a tuma nota di e situacion y a manda boto di polis mesora. Tabatin varios boto staciona na e isla, y por pensa cu tabata un ‘mini’ fuik pero na Klein Curacao. Pues aya tambe cierto grupo di hoben ta reta e reglanan di Covid19 y ta mustra cu nan ta sigui cu nan bida sin tene cuenta.