Oduber: Pa otro siman lo caba e prome lote di vacuna

ORANJESTAD - Cu e speed cu Aruba ta vacunando pa otro siman diasabra 06 maart 2021 nos lo caba cu e promer batch di 11.700 vacuna cu nos a ricibi. Asina minister di salud Dangui Oduber a bisa e portal aki diadomingo. Segun e mandatario, for di luna di december 2020 su ministerio conhuntamente cu DVG y varios otro departamento tawata preparando pa e yegada di e vacunanan. " Nos a traha un plan di ehecucion cu ta e plan nacional di vacunancion di pais Aruba". E promer siman di januari 2021 e minister a anuncia e plan aki na communidad y tambe a splica kiko ta bira e strategia pa nos por vacuna nos communidad pa hunto nos por vence e pandemia aki. Aruba a haya bishita di RIVM dia 25 januari 2021 y nan a keda sumamente impresiona con Aruba tawata preparando su mes.

Despues di esaki a bira conoci cu Aruba lo bai ricibi 11.700 vacuna (1950 flacons) dia 16 februari 2021. Aruba a prepara su mes debidamente pa e momento aki. Nos a haci uso di technologia y innovacion for di comienso di e pandemia pa purba maneha esaki na e mihor forma posibel. Asina aki a lansa e Aruba Health App pa maneha e PCR testing na airport y localnan. Awe e mesun Aruba Health App ta wordo usa pa registracion, inventario y contro di e freezersnan caminda e vacuna ta wordo warda. " Nos a prepara un systema di registracion moderno via Aruba Health App, ta manda notifications pa esnan cu e registra, nos a percura pa bon personal pa recepcion, screening, bon hygiena y e atencion personal pa cada persona cu vacuna. Un staff professional hopi amabel y servicial ta atentiendo nos communidad". Banda di esaki preparacion di logistica, transporte y seguridad. "Awe nos por ta hopi satisfecho cu e resultadonan.Manera cu e vacunanan a yega Aruba dia 16 februari 2021, ja algun ora despues di a ricibi esakinan nos a cuminsa cu e ‘’roll out”. Nos a informa communidad cu lo tin 4 prik locatie y tambe a informa kiko ta nos target di vacunacion pa dia. Nos a cuminsa cu e promer dianan un averahe di 200 vacuna pa dia y ja caba esaki a cambia dialuna 22 februari 2021 cu nos a cuminsa aumenta e capacidad te na 300-400 pa dia. Despues di a pasa e stress test nos a aumenta e capacidad di vacuna te na 1000 pa dia riba diabierna y diasabra ultimo" e mandatario a sigui bisa.  E intencion tawata pa entrante 01 maart 2021 habri tur 4 priklocatie pero considerando e hecho cu nos ta vacunando 1000 personan pa dia y teniendo cuenta cu ja caba nos a vacuna 6005 persona, e promer batch di 11.700 lo ta cabando otro siman diasabra. TEMPO RECORDDen un tempo record di apenas 11 dia nos a percura pa 6005 persona haya e vacuna di cual 4555 ta e grupo riba 60 anja di edad. Importante pa menciona tambe ta e hecho cu nos tin 21,227 personan registra cu kier haya e vacuna y di e cantidad aki 9227 persona ta riba 60 anja di edad. Considerando cu pa otro siman nos lo caba cu e promer batch di vacuna no tin necesidad pa habri tur 4 prik locaties mas entrante 1 maart 2021."Segun e schedule di di vacuna cu nos ta ricibi for di Hulanda nos lo ta hayando e di dos batch di 11.700 vacuna (pa duna e di dos shot) e di dos siman di maart 2021 y e di tres batch nos lo ta hayando fin di maart 2021". Na momento cu nos haya e di tres batch lo habri tur 4 priklocatie y lo por aumenta e capacidad entre 1400-1600 vacuna pa dia."Nos mester informa communidad cu nos ta depende di Hulanda cuanto vacuna nos ta bai haya pero nos kier garantiza communidad cu lo tin vacuna pa tur hende y tur hende lo yega na turno. Cu e speed cu nos ta bayendo e promer batch di 11.700 lo caba si pa otro siman diasabra Nos ta pidi communidad pa keda registra muy especialmente esnan cu ta riba 60 anja, presenta na bo afspraak y tene cuenta cu e orario. Communidad a responde masalmente na e yamada pa tuma e vacuna y esaki ta yena nos cu satisfaccion considerando con importante e vacuna aki ta pa nos communidad. Minister Oduber kier a gradici tur colega ministrer pa e sosten y cooperacion, e super team di ministerio TVS, team di vacuna, team di Dvg, personal di polis, Cea, Setar y tur otro departamento cu ta contribuyendo na e exito di e campanja. Minister Oduber ta personalmente hopi envolvi pa percura pa nos logra e meta den harmonia y union. E ta convenci cu esaki ta nos solucion y salida for di e pandemia aki. Hopi satisfecho cu Aruba ta respondiendo na e yamada pa vacuna. Mas liher nos vacuna, mas bida nos lo scapa, mas mihor protehi nos ta, mas liher nos ta crea immunidad y mas nos por progresa" minister Dangui Oduber a finaliza bisando.