Bikker: Sospechoso M. a haya toegangontzegging pa Bestuurskantoor

ORANJESTAD – E sospechoso di abuso sexual di menor, Jason M, a haya ‘toegangsontzegging’ pa e.o. Bestuurskantoor/Cocolishi. Asina minister di husticia mr Andin Bikker a informa noticiacla diabierna merdia. Esaki tabata necesario pasobra e persona aki tabatin aceso na e areanan menciona pa por a eherce su trabou mediatico pa e.o. e mandatario di husticia. 

TRABOU

Prome cu su detencion, M. tabata e.o. encarga cu suministracion di relatonan di prensa, y e parti mediatico di e ministerio di e.o. sr Bikker. Manda comunicado, percura pa prensa haya informacion di e trabounan di e mandatario, tabata entre su trabounan. Coordina eventonan mediatico tambe tabata parti di su labor. Pero asina mes, e mandatario a sinti cu tabata necesario pa ‘clarifica’ e relacion di trabou cu e y su ministerio tabatin cu e persona cu desde diahuebs a bira un sospechoso di husticia. 

CLARIFICACION

Segun e mandatario di husticia a sigui bisa cu M. ”ta traha pa un compania di un otro persona cu ta duna servicio mediatico, pues e sospechoso no ta empleado di Land Aruba ni tin contract cu Land Aruba” e mandatario a sigui bisa. “A informa e compania mediatico concerni inmediatamente cu pa e servicionan di e compania ta impone un toegangsontzegging pa e sospechoso y cu lo sigui evalua otro pasonan huridico pendiente y investigacion” e mandatario a sigui bisa. “ Por lo demas por tuma contacto cu Ministerio Publico” a finalisa su mensahe breve riba e tema, ora cu e portal aki a puntra e mandatario pa su reaccion.